اوتھل (بلوچستان ٹوڈے) اوتھل کے قریب کوئٹہ سے کراچی جانے والی مسافر کوچ خوفناک حادثے کا شکار ہوگئی کوچ پتھروں سے بھرے ایک ٹرک سے ٹکرا گئی جس کے نتیجے میں 6 افراد موقع پر ہی جاں بحق جبکہ 19 شدید زخمی ہوگئے۔
عینی شاہدین کے مطابق حادثہ تیز رفتاری اور قومی شاہراہ کی خستہ حالی کے باعث پیش آیا تصادم اس قدر شدید تھا کہ کوچ کا اگلا حصہ مکمل طور پر تباہ ہوگیا اور کئی مسافر گاڑی کے ملبے میں پھنس گئے۔
حادثے کی اطلاع ملتے ہی ریسکیو ٹیمیں اور پولیس جائے وقوعہ پر پہنچ گئیں زخمیوں اور لاشوں کو ڈی ایچ کیو اسپتال اوتھل منتقل کیا گیا، جہاں ہنگامی حالت نافذ کردی گئی ہے اسپتال ذرائع کے مطابق چار زخمیوں کی حالت تشویشناک بتائی جا رہی ہے، جن میں خواتین اور بچے بھی شامل ہیں انتظامیہ نے شاہراہ پر ٹریفک کو بحال کر دیا ہے تاہم متاثرہ کوچ اور ٹرک کو سڑک کے کنارے منتقل کر دیا گیا ہے۔