بولان (مانیٹرنگ ڈیسک) بولان کے علاقے آب گم گاؤں میں نامعلوم افراد کی جانب سے گھر کے باہر بیٹھے افراد پر ہینڈ گرنیڈ سے حملہ کیا گیا جس کے نتیجے میں ایک شخص جاں بحق جبکہ تین شدید زخمی ہو گئے۔
ایس ایس پی کچھی رانا محمد دلاور کے مطابق واقعہ رات کے وقت پیش آیا جب نامعلوم حملہ آور اندھیرے کا فائدہ اٹھا کر موقع سے فرار ہو گئے جاں بحق ہونے والے شخص کی شناخت احمد کے نام سے ہوئی ہے جبکہ زخمیوں میں ذوہیب، وادود اور میر ہزار شامل ہیں۔
تمام زخمیوں اور جاں بحق شخص کو فوری طور پر سول ہسپتال مچھ منتقل کیا گیا ہے ایس ایس پی کے مطابق تمام متاثرین کا تعلق راہیجہ قبیلے سے ہے۔
واقعے کے بعد پولیس اور قانون نافذ کرنے والے اداروں نے علاقے کو گھیرے میں لے کر سرچ آپریشن شروع کر دیا ہے، جبکہ حملہ آوروں کی تلاش کے لیے مزید کارروائیاں جاری ہیں۔