بلوچستان ضلع آواران کے تحصیل جھاؤ کے مختلف علاقوں میں پاکستانی فورسز کی فوج کشی جاری ہے ۔
بتایا جارہاہے کہ پاکستانی فورسز مقامی مسلح سرکاری جتھوں کے کارندے مشکے اور ھتیچک کی طرف سے جھاؤ میں داخل ہوکر ،دومگ، کُرچ اور راڑ سمیت آس پاس کے دیہات ندی نالوں میں فوج کشی کر رہے ہیں۔
تازہ اطلاعات ہیں کہ مزکورہ علاقوں میں واقع محلوں میں گھس کر فورسز نے لوگوں کو تشدد کا نشانہ بناکر کرچ نامی محلے سے ایک شخص کو حراست میں لیکر لاپتہ کردیا ہے ۔
علاوہ ازیں بلوچستان کے ضلع خاران میں گذشتہ شب مسلح افراد کی بڑی تعداد نے پاکستانی فورسز کے البت میں واقع مرکزی کیمپ کو حملے میں نشانہ بنایاہے۔
ذرائع کے مطابق حملہ آوروں نے راکٹوں و دیگر ہتھیاروں کا استعمال کیا جبکہ کافی دیر تک شدید فائرنگ اور دھماکوں کی آواز سنائی دیتی رہی۔
مقامی ذرائع کے مطابق فورسز کو جانی نقصانات کا سامنا کرنا پڑا ہے تاہم حکام نے تاحال اس حوالے سے کوئی تفصیلات فراہم نہیں کیے گئےہیں۔