بلوچستان کے ضلع ڈیرہ بگٹی سوئی شہر میں نامعلوم مسلح افراد نے فائرنگ کرکے سومار نامی شخص کو قتل کردیا ہے ، قتل کے محرکات معلوم نہیں ہوسکے ہیں ۔
ادھر ضلع مستونگ میں نامعلوم مسلح افراد نے کچھ دیر قبل کلی شیخان روڈ پر مجاہد کالونی کے قریب نامعلوم افراد نے فائرنگ کرکے مقصود احمد ولد عبدالرزاق گرانی ساکن شمس آباد نامی شخص کو زخمی کرکے فرار ہوگئے ۔
بلوچستان کےدارالحکومت شال میں ہوائی گولی لگنے سے خاتون زخمی ہوگئی ہے جسے ٹراماسنٹر منتقل کردیا گیا ۔
دریں اثناء سندھ کے شہر سکھر میں دو گروپوں میں ہونے والا خونی تصادم نے 6 جانیں لے لی ، واقعہ میں 4 خواتین سمیت 6 افراد جان کی بازی ہار گئے۔
پولیس ذرائع کے مطابق یہ واقعہ بچل شاہ میانی میں پیش آیا، دو گروہوں میں خونی تصادم دیرینہ تنازع کے باعث پیش آیا ، جس میں ایک گروہ نے حملہ کر کے ایک شخص کو قتل جبکہ ایک کو زخمی کر دیا۔
دوسرے گروہ نے جوابی حملہ کرتے ہوئے 4 خواتین سمیت 5 افراد کو قتل جبکہ 4 کو شدید زخمی کر دیا، زخمیوں کی حالت تشویشناک بتائی جاتی ہے، پولیس نے علاقے کا محاصرہ کرکے مقتولین اور زخمیوں کو ہسپتال منتقل کردیا ہے۔
خونی تصادم کے بعد علاقے میں شدید خوف و ہراس پھیل گیا ہے، پولیس کی ناکہ بندی سے علاقہ مکین خوف کے باعث گھروں میں محصور ہوگئے ہیں، پولیس کا کہنا ہے کہ ملزمان کی گرفتاری تک سرچ آپریشن جاری رہے گا۔