کراچی( اسٹاف رپورٹرز سے )
جاری طوفانی بارشوں نے بلوچستان کی طرح کراچی کے بلوچ علاقوں میں بھی تباہی مچادی ہے۔ بلوچ یکجہتی کمیٹی کراچی نے اتوار کو کراچی مضافاتی علاقہ گڈاپ کے طوفانی بارشوں کے متاترین کے لئے امدادی کھیپ پہنچادی ۔ یہ امدادی کھیپ تین ٹرکوں کے ذریعے گڈاپ کے مختلف علاقوں میں پہنچائی گئی ہے ۔
امدادی کھیپ میں کمبل، کپڑے، لحاف، سمیت دیگر اشیا ء خوردنوش شامل ہیں۔
بلوچ یکجہتی کمیٹی کراچی کے رضا کار اتوار کی رات سے سیلاب سے متاثرین کی بحالی کے لئے دن و رات کام کررہے ہیں۔ رضاکار گڈاپ میں امدادی سامان تقسیم کرنے میں مصروف ہیں۔
بلوچ یکجہتی کمیٹی کراچی کی آرگنائزر آمنہ بلوچ نے سندھ حکومت پر شدید تنقید کرتے ہوئے کہا کہ حکومت کی جانب سے سیلاب زدگان کو بے یار و مدد گار چھوڑدیا گیا ہے ۔ ان کی بحالی کے لئے سرکاری سطح پر کوئی بھی اقدامات نہیں اٹھائے جارہے ہیں۔
انھوں نے بلوچ مخیر حضرات کو سیلاب زدگان کی مدد کی اپیل کرتے ہوئے کہا کہ وہ زیادہ سے زیادہ امدادی عمل کا حصہ بنیں تاکہ اس مشکل گھڑی میں سیلاب سے متاثرہ لوگوں کے دکھ درد میں شامل ہوسکیں۔
انہوں نے حکومت پر زور دیتے ہوئے کہا کہ اس وقت حکومت کی یہ ذمہ داری بنتی ہے کہ وہ سیلاب زدگان کی بھرپور مدد کریں۔
