کیچ ءِ تھسیل مند ءَ پاکستانی لشکر ءَ دراھیں کماش وتی بنجل ءَ لوٹائینتگ اَنت ءُ آھانی سر ءَ زوراکی کنان ءَ روانک کشّگ ءِ پرمان داتگ-
گیشیں ھالانی رِد ءَ گوستگیں بیگاہ ءَ پاکستانی لشکر ءُ ایم آئی ءِ کارمنداں مند ءِ کماش فون کتگ اَنت ءُ لھتے مردم ءِ لوگ ءَ کلوہ دیم داتگ ءُ وتی بنجل ءَ لوٹائینتگ اَنت، بنجل ءِ سربوگ ءَ گوں لشکری کارمنداں دراھیں مردمانی چم بستگ اَنت ءُ زوراکی ءِ نشانگ کتگ اَنت، لھتے مردم لشکری کارمنداں بے کساس لٹ داتگ اَنت-
لشکری کارمنداں زوراکی کنان ءَ گوشتگ کہ مند ءِ مردماں پاکستان ءِ بگیری ءَ ءُ آجو بلوچستان ءِ پلّہ مرزی ءَ روانک کشّ اِتگ ءُ اوگام جتگ چریشی ءِ پسّہ ءَ شمارا باندا بزانکہ دوشمبے ءَ یک روانکے کشّگی اِنت روانک ءَ شمارا پاکستان ءِ بیرک دست ءَ بہ بنت پاکستان ءُ پاکستانی لشکر ءِ پلّہ مرزی ءَ ءُ آجو بلوچستان ءِ بگیری ءَ شمارا اوگام جنگی اِنت-
لشکری کارمنداں یک کاگزے نبشتہ کتگ کہ آئی ءِ تہ ءَ ھمے نبشتہ بوتگ کہ ما باندا پاکستان ءِ پلہ مرزی ءَ روانکے کشّ اِیں اگاں روانک نہ کش اِت گڈا ما وتی تاوان ءِ زمہ وار وت اِیں ھمے کاگز ءِ سر ءَ دراھیں مردمانی دزرند گپتگ اَنت-
پاکستانی لشکر ءَ بنجل ءَ لوٹائینتگیں مردم ھمے شرت ءَ یلہ داتگ اَنت کہ شما باندا روانکے کشّ اِت اگاں ناں گڈا شمے مردماں ما آوار جن اِیں، ھندی مردمانی گوشگ اِنت کہ دوشی ادار یک ءَ دراھیں مردم لشکر ءَ یلہ داتگ اَنت بلے آھانی توک ءَ باز مردم لشکری کارمنداں بے کساس لٹ داتگ-
زانگ بہ بیت کہ دو روچ ءَ پیش مند ءِ لس مھلوک ءَ پاکستان ءِ بگیری ءَ ءُ راجی آجوئی جنز ءِ پلہ مرزی ءَ روانکے کشّ اِتگ پمیشکہ پاکستانی لشکر آھانی سر ءَ زوراکی کنگ ءَ اِنت ءُ وتی پلہ مرزی ءِ ھاترا روانک کشّگ ءِ پرمان دیگ ءَ اِنت-
مردمانی گوشگ اِنت کہ ما ھچبر پاکستان ءُ آئی ءِ زوراکیں لشکر ءِ منّوک نہ اِنت بلے مارا لشکر ءَ بنجل ءَ برتگ ءُ بے کساس زوراکی ءُ لٹ شاپی ءَ پد ھمے پرمان داتگ کہ باندا الّم شمارا روانک کشّگی اِنت-
