کوئٹہ ( نامہ نگار )
دیوان ئٹ جتا جتا بشخاک اوار ئسر ہرافتیٹی تران، پینل ڈسکشن، ڈاکومینٹری، ڈرامہ، پیپر، ٹیبلو، کتاب مُچی، مشاعرہ تون اوار دو چاپی ہم اوار مسونو۔ دیوان ئٹ گل ئنا بنجائی کماش عزیر بلوچ بنجائی کمیٹی نا باسک سہیل بلوچ، نگرہ بلوچ و حانی بلوچ ساڑی ئسر۔ دا ادبی و چائنداری پروگرام ئٹ خوانندہ و لس ورنا تا بھلو کچ ئس بشخ ہلک۔ـ
دیوان نا اولیکو بشخ نمیران آ غمخوار حیات نا زند و ازم ئنا زی آ پیپر ئس ئسک، ہرادے ہنکین نا سنگت ئس خوانا۔مستی استاد انور صاحب خان نا زند و ازم ئنا زی آ اسہ ڈاکومینٹری ئس شان تننگا، ہراٹی اونا کڑد ئنا زی آ ڈسکشن اوار ئس۔ بلوچی و براہوئی زبان نا ارزشت نا زی اسہ پینل ڈسکشن ئس ئسک، ہرانا پینلسٹاک بنجائی سنگت نگرہ بلوچ و سہیل بلوچ ئسر و د پینل نا موڈریٹر ہنکینی کمک کارمستر سنگت حانُل بلوچ ئسک۔ پروگرام ءِ مون آ دریسہ بلوچ خوانندہ آتا شال اٹ خواننئی ویل و جنجالی تا زی اسہ ڈاکومینٹری ئس نشان تننگا، ہراٹی شال ئنا خواننگی چاگڑد نا زی آ ڈسکشن ئس اوار ئس۔ اندا وڑ پین اسہ پیپر ئس ئسک بلوچ سیاست نا ارزشت نا بابت ئٹ ہرادے ہنکینی زمہ وار دیوان ئٹ خوانا۔ مون مستی بنجائی کماش عزیر بلوچ نا تران ئس، اود تینا تران ئٹ بلوچ، سیاست، خوانندہ سیاست و ننا اینو نا چاگڑد نا زی آ ہیت و گپ کرے۔ تران کریسہ پارے کہ اینو بلوچ خوانندہ سیاست نا بابت ئٹ اسہ اندنو زہن یاکہ خیال ئس جوڑ کننگانے ہرانا گواچنی تون ہچو سیالی ئس اف، دنا خیالاک ہمو جاغہ تیآ جوڑ کنگرہ ہراڑے سیاست جوانی ئٹ گام خلیسہ کیک، و اینو نن خنینہ کہ ورناک سیاسی پروگرام تیٹی اوار مننگ افس و جتا آ چاگڑدی ناجوڑی تا گواچی مریسہ ءُ، و اندا سوب آن اوفک اوار مننگ کن تیار افس، انتئے کہ گواچن آ سیاسی عمل چاگڑدی خرابی تے ایسر کیک۔ ننا ورناتے پُہہ مروئی ءِ کہ بلوچ چاگڑد اینو اسہ نازُرک ءُ دور ئسے ئٹ ہِنیسہ ءِ گڑا ننا ہر عمل اسہ معنہ ئس تخک و ننے اندا تینا عمل تینا راج و چاگڑد نا جوانی کن مرے، نہ کہ اسہ اندنو عمل ئس مرے ہرا ننا چاگڑد ءِ ناجوڑی و خرابی تا گواچی کے۔
گُڈسر ئٹ اسہ مشاعرہ دیوان اڈ تننگا، اوڑان بیدس دیوان اٹ بلوچستان کتاب کاروان نا پِن ئٹ اسہ کتاب مُچی ئس ام اڈ تننگا، ہراکان پروگرام ئٹ بشخ ہلوک تا بھلو کچ ئس تینکن کتاب دائی کرے۔
دا پروگرام ئٹ نمیران آ غمخوار حیات نا زند ئنا بابت گپ کریسہ سنگتاک پاریر کہ پروفیسر غمخوار حیات براہوئی ادب نا ہمو چیدہ ئس کہ ہرا ادبی مزل نا کسر ئٹ مُر آن گروشک تِسکہ۔ غمخوار براہوئی و بلوچی ادب نا ہمو سپاہی تیان اسٹ ئس کہ ہران قلم براہوئی و بلوچی ادب ءِ جہان ئٹ اسہ ادبی و مزاحمتی ءُ پِن ئس تِس۔ اونا مہر بیرہ براہوئی ادب و بولی تون الئوکہ بلکہ تیوہ غا بلوچ راج ئتون ئس، ہمو سوب آن اود براہوئی تون اوار بلوچی ادب کن ام کاریم کریکہ۔ او تینا قلم نا تاغت ئٹ مدام بلوچ راج ئنا راجی و چاگڑدی ویل آتے جہان نا مون آ درشان کریسہ ئسک۔
اندا وڑ دیوان ئٹ استاد انور صاحب خان نا زند و کاریم آتا زی آ گپ کریسہ سنگتاک پاریر کہ ماما اسہ نوشت کار و شاعری تون اوار اوار ازم ئنا جتا جتا غا پِڑ آ تینا بلوچ راج ئنا خزمت ءِ کرینے تینا چاگڑد، راج، دود و لُمی بولی ءِ مستی شون تننگ کن مدام کوشست کرینے، اندا سوب آن ماما بلوچ راج ئٹ مدام اسہ راجی بامڑد ئسے نا پن ئٹ یات کننگک، ماما انور صاحب خان سیاسی شیفی بڑزی تا بشخ مریسہ تینا گڑد ئتون عملی کاریم کرینے تانکہ نن اسہ فکری و شعوری راج ئس چائنگ مرین۔
دیوان ئٹ خوانندہ و لس ورناتیتون اوار شاعر و ایلو پِڑ آتا بھلو کچ ئس دیوان اٹ ساڑی بشخ ہلک و دیوان نا کل بشخ آتا زی آ گپ و ڈسکشن مننگ آن پد دیوان ایسر کننگا۔