2025 نا سال براہوئی ادب کن اسہ تباہی نا سال ئس ثابت مس، ہرا ٹی براہوئی ادب نا بھلا بھلا برجاک ڈھرار، 21 فروری نا نن کن ڈاکٹر صلاح الدین مینگل، 25 فروری نا سہب کن پروانہ میراجی، 16 جولائی نا سہب کن علامہ جوہر براہوئی و ہندن 30 اکتوبر نا نن کن غالب براہوئی حضرت محمد اسحاق سوز براہوئی ننے ہمیشہ کن جتائی نا دڑدے ترسا الا ہنا۔
2025 نا سال براہوئی ادب کن عام الحزن (غم نا سال) آن بار گدرینگا۔ کنا خیال داکا بھلو نسخان براہوئی ادب کن پین مروف۔
سوز براہوئی نا کتاب" جذبات سوز" ٹی محمد عثمان بنگلزئی نوشتہ کیک کہ
"سوز براہوئی ہفت ذوالحج 1366 ( 1947ء) نا سال صوفی عطا محمد سمالاڑی نا ارا شیخ واصل نوک آباد ضلع مستونگ ئٹی ودی مس۔
حضرت محمد اسحاق " سوز براہوئی" براہوئی شاعری نا کل آن بھلا پن ئس، اونا باکمالا شاعری و پرخلوصا شخصیت نا سوب آن اودے تیناک، پیناک کل احترام و عزت تسرہ۔ اونا شاعری ٹی ہمو جمال و روانگی اس کہ ہرا بندغ ئے تینا کریکہ، سیدھا سادہ غا لوزاتے ٹی بھاز بھلو ہیت ئس کریکہ ہناکہ۔
او تینا کتاب سونج رونج ٹی شعر ئس پائک کہ
"زندہ مننگ کن کنے ہنداخہ الے ملخموت
زندگی ئس قوم ئے بشخو شاعری ٹی پوسکنو"
انت کمال نا شعرئسے ہخہ زیباؤ شعرئسے ہموخہ بھلو معنی ئس تخک، ہراتم نن دا شعرئنا کڑمبی ٹی کانہ تو دا شعر است ئنا اسہ آڑسندھ ئسےآ سلک کی سوز صاحب تینا قوم ئنا بےشعوری و بےپہی تہ خنسا پارینے ہئوکہ ای ہنداخہ زندہ مریو کہ دا قوم ئے تغ آن سما تننگ کیو، دا سوچ اسہ دڑدخورو غمخوارو بندغ ئسے نا مننگ کیک، واقعی سوزصاحب تینا شاعری اٹ براہوئی قوم ئے سما تس ہنا۔
سوز صاحب نا لمئی زبان براہوئی ئے او تینے فخرٹ براہوئی ئس پاریکہ و براہوئی تو مہر کریکہ ہندن براہوئی آن بیدس اردو، فارسی ایلو سندھی زبان ئٹی ہم شعر لکھاکہ۔
سوزصاحب اول سر ٹی تینا علاقہ شیخ واصل ٹی اسہ ادبی ادارہ ئس " براہوئی ادبی دنیا" نا پنٹ ملا ہراڑآن تینا بنائی کتاباتہ ہم چھاپ کرے۔
دا وخت سکا سوزصاحب نا ہفت کتاب چھاپ مروکو کل شاعری او ہرافتا پنک
غزلیات سوز، ہدایت نماز،گلشن سوز، جذبات سوز، گروشک، سونج رونج، بہاردل(فارسی شاعری)
داکا بیدس پین کئی مواداک براہوئی، اردو، سندھی و فارسی شاعری نا اوڑتو تخوک اسر، اگہ دا درویشا شاعر نا مواداک خواہندی کننگر تو پین کئی کتاباک اونا چھاپ مننگ کیرہ۔
اللہ تعالی سوز صاحب نا شاعری ٹی ہمو روانی و ہمو زیبائی تخاسس کہ ہر شعرتہ وار وار پاننگ و بننگ نا لائق اس۔
منہ شعرتہ نما مہنا تخوہ
اول سوز تعریف ئے کر رب ئنا
کہ پیدا کرے مچا دنیائے دا
اوکا پد محمد نا کرنی ثنا
کہ اسلام ئنا او ارے پیشوا
اوکا پد صفت یار اصحاب ئنا
اسر دین ئنا زیہا قائم کہ چا
بسک خیال اسہ دے کنے نا گمان
ارے بیوفا داکہ فانی جہان
پیغمبر و پیراک داکا ہنار
زمین نا تہے او کہ آخر خنار
گڑا نی اریس دیر زندہ مروس
ازدے کوچ اے سوز نی ہم کروس
حیاتی آن اخس ارے اف خبر
کروئی ارے مہنا آخر سفر
۔۔۔۔۔
عجب چہرہ نا روشن دنکہ توبے
عجب دنداک موتی خنک آہو
گرنگ نی ایتسہ گیسوتہ اوڑے
کنا استے نی کیسہ داڑے قابو
امر آخر برے پا صبر است ئے
سلِو مرّا و نی دشمن تو دو دو
مفہ مغرور اے بلبل ہتم نا
نہ پھلاتا سلک دا رنگ خوشبو
ارے دنیا فنا نا سوز جاگہ
دمس کر اللہ اللہ لا الہ ھو
۔۔۔۔
بادشاہ تےآن چاوہ مرتبہ ئے تینا بلند
کیس اگر تینا گلی آ دلربا نوکر کنے
دین و ایمان چاوہ عشق ئے عشق کل آن ئے گچین
بندغاک تھوڑی کہ بےدین پار یا کافر کنے
جوان ارے بہتر عبادت لطف پن ٹی عشق ئنا
غیر عشق آن اف ضرورت پین ہچ رہبر کنے
بس کنا قبرآ اے شاغا پھل ئنا طشت ئس صنم
زندگی آن سوز خوش بس موت دا اکثر کنے
۔۔۔۔۔
زندہ مننگ کن کنے ہنداخہ الّے ملخموت
زندگی ئس قوم ئے بشخو شاعری ٹی پوسکنو
۔۔۔
جان ئنا رغ رغ و استٹ عشق زیباتا ارے
خاطران دا بس کنا ہر شعر رندانہ ارے
۔۔۔۔
شاعری انعام ئسے اے سوز چا
دا کہ انعام ئے خدا عام ئے تفک
۔۔۔۔۔۔
عشق ئٹی لازم ارے کننگ وفا اے دلربا
حسن ئنا مذہب ٹی دا لازم ارے یا اف کہ پا
۔۔۔۔۔۔
حسن ئنا تعریف ئے پائے او زبان ہم پین ئسے
او دوی نا لطف لزت نا اثر ہم پین ئسے
۔۔۔۔۔
اگر گل گلاب ئے خزان نا کہ وخت آ
مروسس بقائس تو نن ہم خنانہ
اگر سوز شعرے کہ دا وخت ئٹی چا
مروسس بہا ئس تو نن ہم خنانہ
۔۔۔۔۔
کنے دیسہ ہوش آن بےہوش کیسہ
ہراتم نگاہے نگاہ ٹی خلیسہ
محبت وفا نا تو دستور دن اف
کلو کیسہ راہی نہ تینٹ بریسہ
۔۔۔۔۔
اے سوز دڑد ئکن بس دا است ئنا کہ تینا
تینا بغیر دڑدآن درمان خنتوٹ ای
۔۔۔۔
دنیا نا ارے روشن استار بلوچستان
سر سبز ارے یکا گلزار بلوچستان
آزاد ارے طوق آن ہر وخت غلامی نا
مشہور لقب اونا خود دار بلوچستان
۔۔۔۔۔۔
پین ئنا رندٹ سبک بندغ مریک
خل کبینے جاگہ غا تینا مرے
۔۔۔۔۔
پریشانیکو ایکا مفلسی ئے
کہ دا غمتے ٹی غمخوارس بکارے
کسر کھٹک دروغ زوت آخر
ننے راستی نا گفتارئس بکارے
ننے ذلت نا طرہ اف ضرورت
ننا عزت نا دستارئس بکارے
۔۔۔۔۔۔
خنن سوز جھٹ ئس تینے زندئٹی
کہنگ آن پد دیر دیرے خنو
۔۔۔۔۔
است آ ہتہ اے دیتے تینا
داسا ہرک دا وخت ئے تینا
۔۔۔۔۔
اگر است بندغ نا خل جوڑ مس
او بندغ نسوکا گڑا نسخلے
پنے ہڷ ہمو دوست ئنا سوز نی
کہ سختی نا وخت آ او نیتو سلے
۔۔۔۔۔۔
نی اینو نا اخبارے خوانک ہرک
کہ کہسفنگ پھلنگ نا بیان انت انت
۔۔۔۔۔
نا چہرہ ئے خوانانے کنا است گنوکا
وخت آن مسلمان کنا است گنوکا
مہراتا ای سرحد ٹی رسینگاٹ تو پاریٹ
سر مسنے شاشان ئے کنا است گنوکا
دنیا ٹی فقط سوز کنےحسن پسندئے
زیباتےآ قربان ئے کنا است گنوکا
۔۔۔۔۔۔
درو اسرہ اوفک خیسن تا خواجہ
بہا کیرہ بےچارہ غاک ٹین اینو
۔۔۔۔
کوک دا اس باغ ئٹی کہ سوزے داکا کشبو
ہیت دادے اسل ئٹی خاخوے بلبل پاپرہ
۔۔۔۔۔۔
نی من تے کرینس تنا نوشجان
ننے کیسہ راضی امر پاؤ ٹی
تنا حق ئے ثابت اگر کتون
ننے خسہ کابل نا دریاؤ ٹی
۔۔۔۔۔
کنا دا خوشی نصیبی اس کہ براہوئی ادب نا کل آن بھلا پن ئتو نہ بیرہ ملنگ، تولنگ نا وار دو بس بلکہ اونا شاعری تہ سرجمی اٹ بننگ و اودے گڑاس بنفنگ نا شرف ہم کنے رسینگا، ہراتم بی کوئٹہ /مستونگ آ سفر مروسس تو سوز صاحب تو ملاقات کننگ کن ضرور ہناٹہ، ای تو پاوہ سوز براہوئی نن کہ دا وخت ئنا شیکسپئر ، شیخ ایاز، غالب، رومی ایلو سعدی اسکہ، ہئوکہ نن اودے غالب نا پن ئتو اوار ہموہنو قدر و عزت تروسن، ای وخت ئس جوانا جوانا علمیئا بندغاتے دن زو موکل کننگ آ خنوہ تو کنا است ئٹی بریک کہ دا کل ننا ناروائی و بےبختی تا وجہ غان شاید ننے السا کارہ۔ اللہ تعالی ننا حالت آ رحم کے۔
ہمو سوز کہ ہرا ذوق براہوئی نا یادئٹی شعر لکھا، ہمو سوز کہ ہرا علامہ جوہر براہوئی کن ہوغفوکو مرثیہ لکھا، ہمو سوز کہ ہرا ڈاکٹر صلاح الدین مینگل ئے حقیقیئا ہیتاتیٹ خراج عقیدت پیش کرے اینو ہمو سوز ئنا یادئٹی دیر مرثیہ لکھو، دیر اونا خدمتاتہ خراج تحسین پیش کرو؟
شاید کہ کس کننگ کپ!
اللہ تعالی سوزصاحب نا کامل مغفرت ئے کرسا اودے جنت جہی کے، و پد سلوکا اونا غٹ خاؤت و ننے صبر و سگھ ایتہ
آمین