خضدار ( بلوچستان ٹوڈے)جمعیت علماء اسلام خضدار کے زیر اہتمام سردار زادہ یوسف علی قلندرانی کی مبینہ ماورائے عدالت گرفتاری کے خلاف ایک پُرامن احتجاجی ریلی نکالی گئی، جس میں پارٹی کارکنان اور شہریوں کی بڑی تعداد نے شرکت کی۔
ریلی مرکزی جامع مسجد خضدار سے شروع ہوئی اور مختلف شاہراہوں سے گزرتی ہوئی آزادی چوک پر ایک بڑے جلسے کی شکل اختیار کر گئی۔ شرکاء نے بینرز اور پلے کارڈز اٹھا رکھے تھے جن پر یوسف علی قلندرانی کی فوری رہائی کے مطالبات درج تھے۔
جلسے سے جے یو آئی کے مرکزی، صوبائی اور ضلعی رہنماؤں نے خطاب کیا، جن میں مولانا سائیں قمر الدین، مولانا فیض محمد، مفتی عبدالقادر شاہوانی، مولانا بشیر احمد عثمانی، قاری نذیر احمد شاکر اور مولانا عبد الکریم متوکل شامل تھے۔ مقررین نے کہا کہ جے یو آئی ایک پُرامن اور آئین کی پاسدار جماعت ہے، اور کسی بھی ماورائے عدالت اقدام کو ہرگز قبول نہیں کیا جائے گا۔
رہنماؤں نے حکومت اور انتظامیہ سے یوسف علی قلندرانی کی فوری بازیابی کا مطالبہ کیا اور تین دن کا الٹی میٹم دیتے ہوئے خبردار کیا کہ اگر مطالبات تسلیم نہ کیے گئے تو آئندہ کا لائحہ عمل اعلان کیا جائے گا، جس کی ذمہ داری حکومت پر عائد ہوگی۔
ریلی کا اختتام مولانا سائیں قمر الدین کی پُراثر دعا پر ہوا، جس میں انہوں نے علاقے میں امن و انصاف کے قیام اور مظلوموں کی داد رسی کے لیے دعا کی۔