پاکستانی فوج یہ سمجھتی ہے کہ بلوچ بقا کے لیے جاری جدوجہد کو ختم کیا جا سکتا ہے، تو یہ ان کی محض خام خیالی ہے۔ بی آر پی

 

شال ( پریس ریلیز )بلوچ ریپبلکن پارٹی کے ترجمان شیر محمد بگٹی نے جاری بیان میں کہاہے کہ سردار اختر مینگل پر قاتلانہ حملے کی شدید مذمت کرتی ہے۔ اگر پاکستانی فوج یہ سمجھتی ہے کہ بلوچ رہنماؤں کو نشانہ بنا کر بلوچ قوم کی اپنی سرزمین اور بقا کے لیے جاری جدوجہد کو ختم کیا جا سکتا ہے، تو یہ ان کی محض خام خیالی ہے۔

انھوں نے کہاہے کہ سردار اختر مینگل ایک پُرامن مارچ کی قیادت کر رہے تھے، جس کا مقصد بلوچ خواتین کی جبری گمشدگیوں کے خلاف آواز بلند کرنا تھا۔ بلوچ تاریخ اور روایات سے نابلد پاکستانی فوج اگر یہ گمان کرتی ہے کہ وہ ظلم، جبر اور خونریزی کے ذریعے بلوچ عوام کو زیر کر سکتی ہے، تو یہ اس کی جہالت اور احمقانہ سوچ کی عکاسی کرتا ہے۔

ترجمان نے کہاہے کہ یہ وہی فوج ہے جو یہ سمجھتی تھی کہ نواب اکبر بگٹی کو شہید کر کے بلوچ تحریک کو ختم کیا جا سکتا ہے۔ مگر آج حالات اس کے برعکس ہیں—بلوچ وطن کی جدوجہد ہر گلی، ہر کوچے میں پہنچ چکی ہے، اور ہر نوجوان شہید نواب اکبر بگٹی کے نظریات کو لے کر اپنے وطن کے لیے سرگرم عمل ہے۔