پاکستان ملتان کے علاقہ ممتاز آباد میں ایک گھر سے3 خواتین کی لاشیں برآمد کرلی گئیں۔پولیس کے مطابق شمشاد بی بی، اس کی بہن نسرین اور بیٹی سمیہ کی کئی دن پرانی نعشیں ملی ہیں جنہیں پوسٹ مارٹم کے لئے ہسپتا ل منتقل کردیا گیا ہے ۔
پولیس نے بتایا ہے کہ جس گھر سے خواتین کی نعشیں ملی ہیں اس گھرکو باہر سے تالا لگا ہوا تھا۔ تاہم یہ نعشیں تین سے چار دن پرانی ہیں جن کے حوالے سے پوسٹ مارٹم کی رپورٹ آنے کے بعد ہی پتہ لگایا جاسکے گا کہ آیا انہوں نے خودکشی کی ہے یا انہیں قتل کیا گیا ہے۔
ننکانہ' بھائی نے غیرت کے نام پر بہن کو موت کے گھاٹ اتار دیا، واردات کے بعد ملزم فرار ہو گیا۔
ذرائع کے مطابق بھائی کو بہن کے کردار پر شک تھا جس پر بہن بھائی کے مابین تلخ کلامی ہوتی رہتی تھی۔واردات کے روز دونوں کے مابین بحث اس قدر بڑھی کہ بھائی نے طیش میں آ کر بہن کو جان سے مار ڈالا اور فرار ہو گیا۔
علاوہ ازیں فیصل آباد میں سرگودھا روڈ پر دو ٹرک آپس میں ٹکرا گئے ۔ جس کے نتیجے میں 2افراد زندگی کی بازی ہار گئے۔ جبکہ ایک زخمی ہو گیا ،زخمی کو طبی امداد کے لئے ہسپتال منتقل کر دیا گیا۔
ریسکیو حکام کے مطابق دونوں ٹرکوں کے درمیان تصادم تیز رفتاری کے باعث پیش آیا۔