بھارتی ریاست کیرالا میں رات گئے کشتی الٹ جانے سے 50 افراد پانی میں ڈوب گئے جن میں سے 7 بچوں سمیت 22 افراد کی نعشیں نکالی جا چکی ہیں۔
بھارتی میڈیا کے مطابق ریاست کیرالا کے مالم پورم کے ساحل پر ڈبل ڈیکر کشتی رات کے اندھیرے میں مسافروں کا بوجھ نہ سنبھال پانے کے باعث الٹ کر ڈوب گئی۔ کشتی میں 50 سے زائد افراد سوار تھے۔
اب بھی 25 سے زائد افراد لاپتہ ہیں۔پولیس کا کہنا ہے کہ کشتی میں سوار مسافروں کی تعداد کا اندازہ نہیں ہے۔ 40 افراد ٹکٹ لیکر سوار ہوئے تھے جب کہ درجن سے زائد بغیر ٹکٹ کے سواری کرنے والے تھے اور حادثے کی وجہ بھی گنجائش سے زیادہ افراد کو بٹھانا لگتی ہے۔
کیرالا کی ریاستی حکومت نے حادثے کی جوڈیشل انکوائری کا حکم دیتے ہوئے لواحقین کے لیے 10 لاکھ جب کہ بھارتی وزیراعظم نریندر مودی نے فی کس 2-2 لاکھ روپے دینے کا اعلان کیا ہے۔