اُپّ ھمّل جان۔۔۔۔۔۔۔! من گوں وتی نِزوریں ھاٹیگ ءَ تئی مھروانی ءِ کُجام کِسّہ ءَ دِل ءَ بیاران ءُ ند ءِ زُبان ءَ نبشتہ بِہ کن آں، چی ءَ کہ مرچی تو منی زانت ءُ پھم، ھیال ءُ سما، دل ءُ چمّاں ابید بلوچ راج ءِ دِل ءُ دیدگاں، راجدپتر ءِ ابدمانیں تاکانی سر ءَ زِندگیں کارِستے ءِ داب ءَ ابدمان ءُ سھرا ئے۔۔۔۔۔۔۔
بِہ گْوش! ھمّل جان من تئی کُجام شیرکِنیں نِند ءُ نیاد، گپّ ءُ ھبراں گیر بیاراں کہ تو گوں سنگت ءُ بیلاں وتی سنگتی ءِ ھکّ پیلو کُت ءُ رپت ئے۔ پمشکا مرچی منی باتِن ءِ اندر ءَ اے ھیال ءَ جھ جتگ کہ تئی گوھریں یاتاں گوں وتی زِرد ءِ لھڑیں پاھاراں بِہ کمایاں دانکہ بے سبریں دِل کرار بِہ گیت ءُ شُمئے بُرّ اِتگیں پند ءِ کِسّہ ءَ گوں وتی نِزوریں توکل ءُ ھاٹیگ ءَ مانایے بِہ دے آں۔۔۔۔۔۔۔۔۔۔
ھمّل جان! یکّے من ءَ تئی راست گْوشی ءَ ھم گیش سان مند کُتگ اَت، ترا کہ کسے ءَ گپّے گْوشگی اَت تو تچک ءَ تچک گْوشت۔ پرے ھاتِر ءَ تو منی باتن ءَ راست گْوشی ءِ نام ءَ جاہ کُتگ اَت، پمشکا مرچی من کہ وتی چمّاں اے گْور ءُ آدیم ءَ شانک دے آں داں ھمے سما بیت کہ منی کش ءُ پھنات ءَ کسے ساڑی نہ اِنت، بلے آئی ءِ کندگانی توار انگت گُوشاں ھلوت ءُ ھمے گْوشگ ءَ اَنت کہ نوکاپ اے زِندگی جوانیں کِردارے ءِ نام اِنت، اگاں کسے ءَ کِردار نہ بوت آ سد سال زِندگ بِہ بیت بے مانا۔۔۔۔۔۔۔۔۔۔۔
پمشکا ھمّل جان من اے گپّ ءَ پہ سِتک گْوش آں کہ تئی لاگریں بالاد پمّن یک زانت بکشیں درونتے اَت، ءُ اے درونت دانکہ زِندگاں شموشگ ءُ بے ھیال کنگ نہ بیت۔۔۔۔۔۔۔۔، چی ءَ کہ اے درونت ءِ بے ھیال کنگ وتی جِند ءِ شموشگ ءُ بے ھیال کنگی اِنت۔۔۔۔۔۔۔۔۔۔۔۔
ھمّل جان! ترا یات بیت کہ تو من ءَ دائم sir گْوشت، یکروچے من ترا گْوشت من ءَ Sir مہ گْوش، اے گْرانکدریں لبز پمّن نہ اِنت۔ تو گْوشت من گْوش آں، ھِچّ مہ گْوش ءُ ھاموش بو۔۔۔۔۔۔ یک شوکیں ٹھکے دات ءُ پاد اتک ئے۔۔۔۔۔۔۔۔۔۔
ھمے مْیان ءَ یکروچے من ترا گْوشت ھمّل جان من ترا، واجُل گْوش آں ءُ تو ھِچّ مہ گْوش۔۔۔۔۔۔۔۔۔ تو چِڑکّہ کُت ءُ گْوشت نا! من ھمّل آں بس۔۔۔۔۔۔۔ھاھاھا۔۔۔۔۔۔۔۔
ھمّل جان! تئی نمیران بُوَگ ءَ پد من ھما اِنت کہ جیڑگ ءَ آں کہ پہ ترا چے بِہ گْوش آں۔۔۔۔۔۔۔۔، چے نبشتہ بِہ کن آں۔۔۔۔۔۔۔۔۔
چی ءَ کہ چہ منی ند ءِ لبزاں تئی مھروانی ءُ سنگتی ءِ گوھریں کِسّہ دستے ھما دیم اِنِت۔۔۔۔۔۔۔۔۔، پمشکا من ءُ منی ند میارِیگ نہ اِیں، چی ءَ کہ تئی داتگیں دیمونی ءِ دیم ءَ منی لبزاں بال کُتگ۔۔۔۔۔۔۔۔
ترا یات اِنت! تئی نمیران بُوَگ ءِ سپر ءَ دو ساھت پیسر من ءُ تو مُلّا ءِ کِرّ ءَ شُتاں ءُ تو گْوشت کہ من ءَ کمّیں کار ھست۔
من ءُ تو مُلّا ءِ کِرّ ءَ چاہ وارت ءُ گوں مُلّا جان ءَ شُگُل، کندگ ءُ مزاک بوت، ءُ ترا مُلّا ءَ گْوشت کہ تو بِہ نِند نوکاپ بِلّے روت
من ءُ تو کمّیں گپّ جن آں، مرو۔۔۔۔۔۔۔۔۔
تو ھمد ءَ ٹھکّے دات ءُ گْوشت کہ من سنگت ءَ نیمراہ ءَ یلہ دات نہ کن آں، ءُ اے پمّن ھیبے۔۔۔۔۔۔۔چی ءَ کہ من بلوچے آں۔۔۔۔۔۔۔۔۔
ھمّل جان! گُڈّی ءَ ترا گپّے ھال دَیَگ لوٹ آں کہ تئی نمیران ءُ وژنام بُوَگ ءَ تئی دوست ءُ سنگت گل ءُ شات اَنت کہ تو وژنامیں مرگے ءِ واھند بوت ئے، بلے تئی اِشتاپیں رَوَگ ءَ سک گمیگ ءُ دردیگ اَنت۔
تئی شھیدی ءِ دومی روچ ءَ من ءَ باگی جان اناگت ءَ توار کُرت گْوشت کہ بیا کارے ھست، من وھدے باگی جان شُت ءُ دیست داں تئی مھروانیں سنگت باگی جان ءَ ارساں نہ مرّینتگ ءُ دیم پہ گْورجیگ ءَ سرجھلاد اَنت کہ جتا بوتگیں ھمبلانی آسیں درد سگّگ ءُ اُوپار کنگ نہ بَہ اَنت۔۔۔۔۔۔۔۔۔
کمو دیراں پد من ءَ باگی جان گْوشت سنگت ھمّل جان ءِ بارو ءَ سنگت جُست کنگ ءَ اَنت کہ ھمّل جان راجکاری ءُ جُھد ءِ کدی بھر بوتگ۔۔۔۔۔۔۔۔۔۔۔۔۔؟
بلے! ما دوئیناں داں شرّیں ساھتے ءَ ھِچّ گْوشت کُرت نہ کُت،
چی ءَ کہ تئی اِشتاہیں رَوَگ ءَ انچیں دردے بکشاتگ اَت کہ مئے جیڑگانی سر گار اَت ءُ ما وتی جِند ءِ شوھاز ءَ درکپتگ اِت اِیں، وھدے سما کُت داں تئی زپتیں جتائی ءِ انگریں یات پد ءَ زِرد ءِ جنگل ءَ تالان اَت ءُ چہ زُبان ءَ ھوری ءَ ھمے گپّ در اتک کہ تو نمیران بوت ئے گوں سنگتاں۔۔۔۔۔۔نمیران۔۔۔
