ھزدار: گودگ ءِ گونِکو ءَ مردماں پاکستانی لشکر ءِ داشتگیں کشندہ ٹولی ءِ کارمند سمد سمالاڑی ءُ اے سی ءِ بگیری ءَ زھرشانی کرتگ ءُ سی پیک دگ بستگ۔
اھوالکار ءِ رد ءَ سمد سمالاڑی پاکستانی لشکر ءِ کشندہ ٹولی ءِ سروکے گودگ ءِ مردماں وتی جند ءِ ڈگارانی سر ءَ چات جنگ ءَ نیلگ ءَ اِنت۔ گودگ ءَ چنچو وانگجاہ ھست پاکستان ءِ کشندہ ٹولی ءِ کارمنداں دستیگ کرتگ ءُ پہ وت گس جوڑ کرتگ ءُ نشتگ اَنت۔ کشندہ ٹولی ءِ کارمنداں وتی گسانی دیم ءَ بور جتگ، بلے ھندی آدگہ مردماں نیلگ ءَ اَنت۔ ھمک روچ مردماں زوراکی نشانگ کنگ ءُ دلسیاہ کنگ ءَ اَنت۔ مرچی مردماں بازیں کچے ءَ سمد ءِ بگیری ءَ زھرشانی کرتگ ءُ گوِنکو ءَ سی پیک دگ بند کرتگ۔ زھرشانی ءَ بازیں کچے ءَ جنین ءُ زھگاں بھر زْرتگ۔
بنشون ءِ رد ءَ زھرشانی کنوکیں مردمانی تامربند رسانکدر ءَ شنگ بیتگ اَنت کہ تامربندے ءَ مردمے گپ کنگ ءَ اِنت کہ سمد پہ لَٹ ءِ زور ءِ مئے میتگ ءِ بورنگ بند کرتگ ءُ ادا وانگجاہ ھم دسیتگ کرتگ اَنت۔ ما ھندی میر ءُ سردارانی گوْر ءَ شتگ ایں وتی پریات برتگ، آئی ءِ بگیری ءَ کس گہ جت نہ کنت۔ ما اے سی ءِ کِرا شتگیں آئی ءَ مارا ھمے گوشتگ کہ شما درکانودی بورنگ جنگ ءَ اِنت شمارا موکل نیست۔ بلکیں ما اے بورنگ ءَ پہ دگہ کشت ءُ کشاری ءَ جنگ ءَ نہ ایں، اے مئے میتگ ءِ آپ ورگی بورنگ اِنت اد ءَ مئے جنین ءُ زھگ پہ آپ ءِ آرگ ءَ بزگ اَنت۔
آئی گوشگ اِنت کہ من ءَ سمد ءَ بیھار داتگ ءُ گوشتگ کہ من شمار اد ءَ ھچ وڑ ءِ بورنگ جنگ ءَ نیلاں منی رزا ءَ اَبید اد ءَ کس ھچ کرت نہ کنت۔ اے سی ءِ ھم گپ ھمے بیتگ اَنت ءُ آئی ءَ مارا ھمے بیھار داتگ کہ ما شمارا پہ میتگ ءَ بورنگ جنگ ءَ نیل ایں۔ شما چہ اد ءَ وتی تیوگیں میتگ ءَ بلڈ اِنت ءُ دگہ جاھاں برو اِت۔
آئی گوشگ اِنت کہ سمد سرکار ءِ مردم اِنت ءُ اے ھند ءَ آ وتی زور ءِ بادشاھی ءَ برجاہ دارگ ءَ اِنت ءُ مردمانی سر ءَ ناھکی زوراکی کنگ ءَ اِنت۔ مارا سمد ءُ اے سی ءَ بیھار داتگ کہ شما بلڈ اِت ءُ وتی میتگ ءَ ھالیگ بہ کن اِت۔ ھمے کینگ ءَ ما ھچ وڑ ءَ سی پیک دگ پچ نہ کن ایں ءُ دانکہ پاد نیاھیں سمد ءَ مئے سر ءَ ناھکیں زوراکیانی جُست گرگ نہ بیتگ۔ اگاں سرکار مارا پہ زور دگ ءَ پچ کنگ لوٹ ایت گڑا بیت گوں وتی تاکت ءِ زور ءَ مئے میتگ ءَ بلڈوزر بہ کنت۔
