ادیس ابابا (مانیٹرنگ ڈیسک) مشرقی افریقی ملک ایتھوپیا میں مسلح افراد نے امہارا اقلیت کی آبادی پر حملہ کردیا جس میں 100 سے زائد افراد ہلاک اور اتنے ہی زخمی ہوگئے۔ عالمی خبر رساں ادارے کے مطابق ایتھوپیا کے اورومو ریجن میں مسلح افراد نے ایک مخصوص اقلیت امہارا کی بستی میں گھس کر قتل عام کیا۔ عینی شاہدین نے میڈیا کو بتایا کہ مسلح افراد لوگوں کو اندھادھند گولیوں سے بھون رہے تھے۔ بچوں اور خواتین تک کو نہ بخشا گیا۔ ریسکیو اداروں کو جائے وقوعہ سے 100 سے زائد لاشیں ملی ہیں جب کہ اتنے ہی زخمی ہیں جبکہ آزاد ذرائع کے مطابق ہلاکتوں کی تعداد 200 سے تجاوز کرگئی ہیں۔ عینی شاہدین بھی تعداد 200 سے زائد بتا رہے ہیں۔ ہلاک ہونے والوں کی اجتماعی تدفن کی جا رہی ہے۔حکومت کی جانب سے حملے کی ذمہ داری اورومو لبریشن آرمی پر عائد کی گئی ہے۔ علیحدگی پسند یہ باغی تنظیم اس سے قبل بھی امہارا اقلیت پر حملوں میں ملوث رہی ہے۔ دوسری جانب اورومو لبریشن آرمی کے ترجمان نے حکومتی دعوؤں کو مسترد کرتے ہوئے کہا ہے کہ ایک بار پھر وزیراعظم ابی احمد نے اپنے جرم کا الزام ہم پر عائد کردیا
