بلوچستان کے ضلع کیچ کے علاقے تمپ میں کونشقلات کے مقام نامعلوم مسلح افراد نے ایک موبائل ٹاور کو حملے میں نقصان پہنچایا ہے جس کی ذمہ داری بلوچستان لبریشن فرنٹ نے قبول کی ہے۔
منگل کی شب نامعلوم افراد نے یوفون کمپنی کے ٹاور پر فائرنگ کی اور مشینری کو نذر آتش کردیا جس کے باعث علاقے میں موبائل سروس منقطع ہوگئی۔
بلوچستان لبریشن فرنٹ کے ترجمان میجر گہرام بلوچ نے بیان جاری کرتے ہوئے کہا ہے کہ سرمچاروں نے بلوچستان کے ضلع کیچ کے علاقے تمپ کے کونشقلات میں یوفون کی موبائل فون ٹاور پر حملہ کرکے مشینری کو مکمل نذر آتش کردیا۔
ترجمان نے کہا کہ اس حملے کی ذمہ داری تنظیم قبول کرتی ہے اوربلوچ تحریک آزادی سے جڑے افراد کی جاسوسی کیلئے استعمال ہونے والے اس طرح کی ریاستی مفادات کے تنصیبات ہمارے نشانے پر ہیں۔
