نیدرلینڈ:بلوچ راجی زْرمبشت (بی این ایم) نیدرلینڈ ھنکین ءِ نیمگ ءَ جنینانی زورانسری بیگواہ کنگ ءِ بگیری ءَ زھرشانی کنگ بیتگ،زھرشانی ءَ زھگ ءُ جنینان ھوار جتائیں بھرگانی مردماں بازیں کچے ءَ بھر زُرتگ ءِ مردماں بلوچ جنین ءُ نودربرانی زورانسری بیگواھی ءُ بلوچستان ءِ سر ءَ پاکستانی زوگری ءِ بگیری ءَ اوگام جتگ۔
زھرشانی ءِ میان ءَ بی این ایم ءِ نیمگ ءَ پاکستان ءِ زوراکی ءُ بلوچ جنین ءُ نودربرانی زورانسری بیگواہ کنگ ءِ بابت ءَ پنتاک بھر کنگ بیتگ۔زھرشانی ءَ ھندی مردماں ھم بھر زُرتگ ءُ بی این ایم نیدرلینڈ ھنکین ءِ باسکاں ھندی مردم پاکستان ءِ بلوچستان ءِ سر ءَ دستیگ کنگ ءُ زوراکی،جنین ءُ نودربرانی زورانسری بیگواہ کنگ ءِ بابت ءَ سرپدی داتگ اَنت۔
زھرشانی ءَ تران کنان ءَ بی این ایم نیدرلینڈ ھنکین ءِ سرکماش کیّا تران کُرتگ ءُ گْوشتگ کہ مرچی ما وتی ڈیھ ءَ نشتگیں بلوچ راج ءَ سرپد کنگ لوٹاں کہ ما مدام پہ وتی ڈیھ ءِ سر ءَ بیتگیں زوراکیانی بگیری ءَ گپ جتگ ءُ وتی ناوشی یاداشت کُرتگ۔ مرچی ھم ما نورجان ءِ زورانسری آوار جنگ ءُ دروگیں ارزی ءُ بُھتاماں ایر جن ایں، ما ھمے سرپد بہ ایں کہ اے بلوچ دودانی لگتمال کنگ اِنت۔
آئی گْوشتگ کہ بلوچ چاگرد ءِ تہ ءَ جنین مزنیں شرپے ءِ نگاہ ءَ چارگ بنت۔اگاں یک ھونی جیڑھے بہ بیت ءُ جنین میانجی ءَ بئیت گڑا جیڑہ ھلاس کنگ بیت۔بلوچ چاگرد ءَ جنین ءِ شرپ چہ جھان ءِ دُرسیں جاگھاں گیشتر اِنت۔
آئی ءَ تران کناناں گْوشتگ کہ بلوچ ءِ آجوئی ءِ جنگ ءَ پاکستانی لشکر ءَ پروش وارتگ پمشکا نوں جنیناں آوار جنگ ءَ اِنت۔ ما جھان ءَ گْوشگ لوٹ ایں کہ چہ شُمئے بےتواری ءِ سْوب ءَ مرچی بلوچ ءِ چُکچینی کنگ بیگ ءَ اِنت۔ جھان بایدیں گوں پاکستان ءَ وتی دُرسیں نزیکیاں رد بہ کنت ءُ پاکستان ءَ زور بہ دنت کہ آ وتی زورگریں لشکر ءَ چہ بلوچستان ءَ بہ کَش ایت۔
زھرشانی ءَ تران کنان ءَ اھسان ھیدر گْوشتگ کہ بلوچ راج ءِ سر ءَ پاکستان ءَ زوراکی ءِ نوکیں دْرچے بندات کُرتگ۔ پاکستان چہ مردمگری ءَ پَدمنتگیں ڈیھے پمشکا جنیناں آوار جنگ ءُ زورانسری بیگواہ کنگ ءَ اِنت۔اے چیز پاکستان ءَ سک گران ءَ کپیت۔
بلوچ ایکٹیویسٹ ءُ بی این ایم ءِ باسک جمال تران کنان ءَ گْوشتگ کہ مرچی ایں زھرشانی ءَ ما جھان ءَ سرپد کنگ لوٹ ایں کہ پاکستان ءَ مردمی اگبالاں لپاشگ ءَ اِنت، پاکستانی لشکر بلوچستان ءَ لشکرکشی ءُ جنین ءُ مردماں زورانسری آوار جنگ ءُ بیگواہ کنگ ءَ اِنت۔
