گچک: کرک ءِ ڈل ءَ پاکستانی لشکر ءَ مرچی روچ ءِ ادار سے ءَ بیڑ برتگ ءُ دو جنین ءُ زھگے ءَ ھوار پیر مردے آوار جتگ۔
اھوالکار ءِ رد ءَ پاکستانی لشکر ءَ شاہ بی بی ء سھراب، شھزادی ء اَبدُرھمان گوں شش روچی زھگے ءُ کماش اَبدُرھمان زورانسری آوار جتگ ءُ وتی بنجل ءَ برتگ اَنت۔ انگت یل کنگ نہ بیتگ اَنت۔ گوستگیں روچاں ھمے کھول ءِ دگہ یک کماشے ھارون ء رھمین پاکستانی لشکر ءَ 25 اپریل ءَ زورانسری آوار جتگ ءُ وتی بنجل برتگ، بازیں لَٹ شاپ کنگ ءَ کماش ھاروان ءِ جاور ناگیگ اَنت۔ مرچی پاکستانی لشکر ءَ کماش ھارون گِس ءَ آورتگ ءُ سر کرتگ جنین ءُ زھگ گوں کماش اَبدرھمان ءِ ھواری ءَ آوار جتگ اَنت۔
بنشون ءِ رد ءَ اے آوار جتگیں مردم بلوچ جھدکار سالھ ء ھارون ءِ کھول ءِ مردم اَنت، شاہ بی بی سالھ ءِ مات اِنت، شھزادی آئی ءِ نشار اِنت۔ پاکستانی لشکر اے کھول ءَ مدام زوراکی ءِ نشانگ کنگ ءَ اِنت کہ شما سالھ ءَ پہ زور بیار اِت کہ سلاہ ءَ چگل بہ دنت ءُ باجو بہ بیت۔ گوں اے کھول نہ بلکیں بلوچستان راجی جُھدکارانی کھول مدام پاکستانی لشکر ءِ زوراکیانی دیمپان اَنت۔
