مشکے ءُ کولواہ ءَ پاکستانی لشکر ءِ لشکرکشی برجاہ اِنت،جنگی بالیگ تَر ءُ گرد کنگ ءَ اَنت

مشکے ءِ روکپتی کوھاں دوشی ئیں شپ ءَ پاکستانی لشکر ءُ ھندی کشندہ ٹولی ءِ کارمند بازیں کچے ءَ پترتگ اَنت۔ زْرمبش اھوالکار ءِ رد ءَ پاکستانی لشکر اسپیت، جانی، پوھان ءُ پتندر ءَ لشکر کشی کنگ ءَ اِنت، ھندی مردمانی ھّر ءُ اولاک اِش گپتگ اَنت۔ دوشی پاکستانی لشکر ءِ گاڑی داں کوہ بُن ءَ شتگ اَنت، لشکری کارمندانی ایر کنگ ءَ پد واتر آتکگ اَنت، لشکر گوں مزنیں کچے ءَ کوھانی تہ ءَ ساڑی اِنت پَٹ ءُ پول کنگ ءَ اِنت۔ انگت دگہ تاوان ءُ آوار جنگی ءِ ھال نیست۔ ھمے وڑ ءَ کولواہ، کلیکور ءُ بالگتر ءِ کوھاں جتا جتاھیں جاھاں پاکستانی لشکر ءِ دوجنگی بالیگاں داں دیر ءَ تر ءُ گرد کرتگ۔ اھوالکار ءِ رد ءَ دوشیگیں شپ ءَ پاکستانی لشکر ءُ بلوچ سرمچارانی میان ءَ ٹوھین میڑے بیتگ دوئیں نیمگاں جانی تاوان ءِ ھال اِنت۔ مرچی ھمے جاہ ءِ کَش ءُ کراں داں دیر ءَ جنگی بالیگ تر اِتگ اَنت۔