دشت: مزن بند ءَ گْوستگیں نوہ روچ بیت پاکستانی لشکر ءِ لشکرکشی یکشلہ برجاہ اِنت

کیچ ءِ دمگ دشت ءُ تُمپ ءِ میانی کوہ مزن بند ءَ نوہ روچ بیت کہ پاکستانی لشکر ءِ لشکرکشی یکشلہ برجاہ اِنت۔ اھوالکارانی رد ءَ مرچی پاکستانی لشکری جنگی بالیگ نیاتکگ اَنت بلے لشکری کارمند کوہ ءِ تہ ءَ ساڑی اَنت۔لشکر ءَ چہ دشت ءُ تُمپ ءِ دوئیں نیمگاں کور ءُ شیپانی دپاں سنگر گِپتگ ءُ نشتگ اَنت۔ لشکر کشی ءِ میان ءَ پاکستانی لشکر ءَ چہ دشت ءَ بازیں مردم ئِے آوار جنگ ءَ پد بیگواہ کُتگ۔ چیزے روچ پیش پاکستانی لشکر ءَ چہ دشت پٹوک ءَ ھشتاد سالی کماشے ءَ ھوار ءَ دہ مردم آوار جتگ اَت۔ بنشون ءِ رد ءَ لشکر ءَ آدگہ مردم یلہ کُتگ اَنت بلے کماش ھاسل ء ھسن جھمنند دشت پٹوک انگت بیگواہ اِنت۔ یات بہ بہ اِت کہ کماش ھاسل پیش ءَ ھم دو سَے رند ءَ لشکر ءَ آوار جنگ ءَ پد داں چیزے وھد ءَ بیگواہ کنگ ءَ پد یلہ کُتگ، آئی ءِ زھگ ھم آوار جتگ ءُ بیگواہ کنگ ءَ پد یلہ داتگ اَنت۔ اے بری ھم کماش ھاسل آواجنگ ءُ بیگواہ کنگ بوتگ کہ انگت بیگواہ اِنت۔ ھمے وڈ ءَ دشت ءِ دمگ مچات، باھوٹ چات ءُ درچکوہ ءَ ھم لشکر ءَ بازیں مردم ئِے آوار جتگ-