افغان سرحد پر کشیدگی برقرار ، پاکستانی فوج اور طالبان کے درمیان جھڑپ جاری

کنڑ (ٹرائبل نیوز ) ٹرائبل نیوز کو افغان طالبان کے ذرائع نے تصدیق کی ہے کہ پاکستانی فوج کیساتھ شام چار بجے سے جھڑپ جاری ہے ۔ طالبان ذرائع کے مطابق جھڑپ اس وقت شروع ہوئی جب پاکستانی فوج نے کنڑ میں افغان علاقوں پر گولہ باری کی ۔ ذرائع کے مطابق پاکستان کی فوج مہمند اور باجوڑ میں اپنے قائم مراکز سے بھاری توپ خانے سے گولہ باری کر رہے ہیں جبکہ طالبان فورسز کنڑ کے سرکانڑ فوجی بیس اور اسمار سے ان کے گولہ باری کا جواب دے رہے ہیں ۔ مقامی افراد نے ٹرائبل نیوز کو بتایا کہ دونوں اطراف سے بھاری توپ خانے کا استعمال کیا جا رہا ہے جس سے علاقے میں شدید خوف و ہراس کی فضاء ہے ۔ علاقہ مکینوں کے مطابق بڑی تعداد میں طالبان فورسز کی گاڑیاں بھی سرحد کیجانب جاتے دیکھی گئی ہیں جس میں ہیوی امریکی گاڑیاں بھی شامل ہے ۔ ابھی تک جھڑپ کے نتیجے میں ہلاکتوں کی کوئی اطلاع موصول نہیں ہوئی ۔