یحییٰ نور محنت مزدوری کرکے اپنے بچوں کا پیٹ پالتا تھا، حکام بالا فوری بازیاب کرائیں، اہلخانہ کی پریس کانفرنس

 

 پنجگور (بلوچستان ٹوڈے) پنجگور جبری یحییٰ نور کے والد اور بھائیوں کا انکی بازیابی کا مطالبہ، یحییٰ نور کے والد حاجی محمد نور، بھائی شاکر نور، خلیل نور اور فیملی کے دیگر افراد نے اپنی رہائش گاہ پر ایک پریس کانفرنس کے دوران مطالبہ کیا کہ میرے بیٹے یحییٰ نور جو پیشے کے لحاظ سے ایک زمباد ڈرائیور ہے کو فوری طور پر بازیاب کیا جائے۔

انہوں نے کہا کہ 25 اکتوبر کو مغرب کے وقت بازار سے گھر آرہے تھے کہ ایئرپورٹ روڑ پر سرف گاڑی میں سوار نامعلوم مسلح افراد ان کو زبردستی گاڑی میں ڈال کر لے گئے جسکی بروقت اطلاع ہم نے پولیس کو بھی دی اور ضلعی انتظامیہ کے سامنے اپنا کیس پیش کردیا تاکہ وہ اس کا کھوج لگا کر بازیابی یقینی بناسکیں مگر ابھی تک اس مسئلے پر کوئی پیشرفت سامنے نہیں آئی۔

 جس سے پورے فیملی میں سراسیمگی پھیلی ہوئی ہے اور وہ کافی پریشان کن حالات سے گزررہے ہیں۔ انہوں نے کہا کہ ہم پرامن لوگ ہیں، میرا بیٹا اپنی زمباد گاڑی کے ذریعے محنت مزدوری کرتا تھا، نہ جھگڑے والا تھا اور نہ ہی فضول گھومتا پھرتا تھا، زیادہ تر وقت اپنے گھر ہی میں رہتا تھا۔

 انہوں نے کہا کہ ضلعی انتظامیہ پولیس سے مطالبہ کرتے ہیں کہ وہ اس سلسلے میں ہماری دادرسی کریں اور یحییٰ نور کو بازیاب کرکے فیملی کو موجودہ پریشان کن حالات سے نجات دلائیں۔