تربت ( نامہ نگار) تربت آپسر بلوچی بازار سے جبری طور پر لاپتہ کیے گئے کم سن طالب علم بالاچ دلوش کے اہل خانہ نے تربت پریس کلب میں پریس کانفرنس کرتے ہوئے کہا ہے کہ 21 اکتوبر 2025 کو سیکیورٹی فورسز نے مبینہ طور پر بالاچ دلوش کو ان کے گھر آپسر بلوچی بازار سے حراست میں لے لیا جس کے بعد سے وہ لاپتہ ہیں۔
بالاچ دلوش کے اہل خانہ کے مطابق وہ ایک کم سن طالب علم ہیں جو جماعت ہشتم میں زیر تعلیم ہیں اور ان دنوں ان کے امتحانات جاری ہیں۔ اہل خانہ نے کہا کہ اگر بالاچ دلوش پر کسی قسم کا الزام ہے تو انہیں عدالت میں پیش کیا جائے تاکہ انہیں قانونی چارہ جوئی کا حق حاصل ہو۔
اہل خانہ نے بتایا کہ انہوں نے ڈپٹی کمشنر کیچ اور دیگر ضلعی حکام سے ملاقات کی تھی جہاں ڈپٹی کمشنر نے ایک ہفتے میں پیش رفت کی یقین دہانی کرائی تھی تاہم ایک ہفتہ گزرنے کے باوجود کوئی پیش رفت نہیں ہوئی۔
اہل خانہ کا کہنا تھا کہ انہوں نے ایف آئی آر درج کروا دی ہے مگر اب تک کوئی نتیجہ سامنے نہیں آیا۔ انہوں نے اعلان کیا کہ اگر ایک ہفتے کے اندر بالاچ دلوش بازیاب نہ ہوئے تو وہ سی پیک روڈ سمیت دیگر مقامات پر دھرنا اور احتجاج کریں گے۔