کیچ ( مانیٹرنگ ڈیسک )تربت یونیورسٹی کے طالب علم احسان سرور اور کامل شریف کی باحفاظت بازیابی کے لیے جامعہ تربت کے طلباء نے احتجاجی ریلی نکالی۔ یہ ریلی کیمسٹری ڈیپارٹمنٹ، انگلش ڈیپارٹمنٹ اور ایڈمن آفس سے گزرتے ہوئے ایجوکیشن ڈیپارٹمنٹ کے سامنے اختتام پذیر ہوا، جہاں طلباء نے اپنے مطالبات کے حق میں نعرہ بازی کی۔
مظاہرین نے دونوں طلباء سمیت تمام جبری گمشدہ افراد کی فوری بازیابی کا مطالبہ کیا۔
مظاہرین طلباء نے کہاکہ مظاہرہ کا مقصد صرف اپنے ساتھیوں کی بازیابی نہیں، بلکہ اس کے ذریعے یہ پیغام دینا بھی ہےکہ حکومت اور متعلقہ ادارے جبری گمشدگیوں کے مسئلے کو سنجیدگی سے حل کریں۔
طلباء نے یہ بھی کہا کہ یہ مسئلہ صرف ان کی یونیورسٹی تک محدود نہیں، بلکہ پورے بلوچستان کے ہر طالب علم کے لیے ایک اہم اور سنجیدہ مسئلہ ہے۔
انہوں نے حکومت سے مطالبہ کیا کہ وہ احسان سرور، کامل شریف اور دیگر گمشدہ افراد کی بازیابی کے لیے فوری اور مؤثر اقدامات کریں تاکہ متاثرہ خاندانوں کو سکون اور اطمینان حاصل مل سکے۔