بلوچ یکجہتی کمیٹی نا رہنما او اسلام آباد اٹی لانگ مارچ او جبری لاپتہ بندغاتا پھاش کننگ کن لگوکا کیمپ اے برجا تخو کا بلو چستان نا مسڑ گودی ماہ رنگ بلوچ تینا ایکس آ پوسٹ کرسہ درشان کرینر کہ ای نُما کل ئنا ہمت ءِ سلام کیوہ کہ ہرا جاگہ تیا برانز مسونے نم داخس ہمت اٹ تینا اُرا تیان پیش تمانُرے، مُد یخ ، ریاست نا نیمغا غان خُلیفنگ، ریاستی زورانسری تیان باوجود انگہ نم پیش تمانرے تینا اُرا تیان دا اندا ہیت ئنا ثبوت ءِ کہ بلوچ تینا شناخت کن، تینا ڈغار کن ہر حد اسکان ہننگ کیک۔ اینو اسہ کلہو اس نمے تننگ بھاز الّمی ءِ اندن کہ نن کس ئسے ئنا اُرا نا چناک اُن، نیاڑیک اُن داڑے اسکان بسونن، ہمر کہ اینو نم کنے تینا ھیڑ پارے اندن کنا نمے آن خواست ءِ کہ نم راج ئکن جہد کیرے گڑا نیاڑی و نرینہ، چنا و بھلنی نا فرق ءِ اُرپبو دا راج اکن نیاڑیک ہم ہموخس کاریم
کننگ کیرہ اخس کہ نرینہ غاک کننگ کیرہ۔
اوک درشان کرینر کہ اینو دا لانگ مارچ ئنا سرسہب مننگ کُل ہمو بندغ آتا ہرافتا نن پِن تے چانہ یا ہرافتا پِن تے نن تپنہ اموفتا قربانی تا سوب آن داڑے اسکان بسونے اینو نن نم کل اسہ سیاسی پلیٹ فارم بلوچ یکجہتی کمیٹی نا شیف آ مُچ اُن و اندا ننے کل راج ء اوڑدہی ٹی مونا درو۔ بلوچ یکجہتی کمیٹی ءِ اینو کہ نم داخس تینا کرینُرے کنے اُمیت ءِ کہ نم بروکا وخت ئٹ ہم بی وائے سی ءِ اندن تینا کرورے و تینا راج ئنا سوگوْی و سرسہبی کن اندا وڑ بی وائے سی نا شیف آ نن نم تینا راج ئکن کاریم کریسہ کرون۔