پیرس :فرانسیسی حکام نے دائیں بازو کے طبقے کی جانب سے شدید تنقید کے بعد پیرس میں واقع آرک ڈے ٹریومپف نامی معروف یادگاری مقام سے یورپی یونین کا پرچم ہٹا دیا ہے۔غیرملکی خبررسا ں ادارے کے مطابق پیرس کے مرکز میں آرک ڈے ٹریومپف پر عارضی طور پر یورپی یونین کا پرچم نصب کیا گیا۔ دائیں بازو کی جانب سے اس پرچم کی تنصیب پر صدر امانویل ماکروں کو شدید تنقید کا نشانہ بناتے ہوئے کہا گیا کہ ماکروں فرانسیسی شناخت مٹا رہے ہیں۔نئے سال کے آغاز پر فرانس کے لیے جنگوں میں اپنی جانیں کھو دینے والوں کی یاد سے منسوب آرک ڈے ٹریومپف پر یورپی یونین کا ایک بہت بڑا پرچم عارضی طور پر نصب کیا گیا تھا۔ اس کی وجہ اگلے چھ ماہ کے لیے یورپی کونسل کی سربراہی فرانس کو ملنا تھی، جو یکم جنوری سے فرانس کے پاس آئی ہے۔دوسری جانب انتہائی دائیں بازو کی رہنما اور سابقہ انتخابات میں صدر ماکروں کی اہم ترین حریف مارین لے پین نے یورپی یونین کے پرچم کو ہٹانے کے مطالبے کے ساتھ اس عزم کا اظہار بھی کیا کہ وہ انتظامی امور سے متعلق اعلی ترین فرانسیسی عدالت سے رجوع کریں گی۔ادھر صدارتی دفتر کی جانب سے کہا گیا کہ یورپی یونین کے پرچم کو ہٹایا جانا پہلے سے طے شدہ تھا۔ صدارتی دفتر کے مطابق مختلف مقامات پر کئی روز سے نیلی روشنیوں سے چراغاں کے برخلاف یادگاری مقام پر یورپی پرچم کی تنصیب فقط دو روز کے لیے طے تھی۔
Share this:
