قلات (بلوچستان ٹوڈے ) حکومتِ بلوچستان کی جانب سے لیویز فورس کو پولیس فورس میں ضم کرنے سے متعلق نوٹیفکیشن جاری ہونے کے بعد قلات سمیت صوبے بھر میں لیویز اہلکاروں نے شدید احتجاج شروع کر دیا ہے۔
قلات میں لیویز فورس کی جانب سے اس فیصلے کے خلاف ایک بڑی احتجاجی ریلی نکالی گئی، جس میں لیویز فورس کے افسران، اہلکاروں اور دیگر عملے نے بڑی تعداد میں شرکت کی۔
ریلی کا آغاز لیویز ہیڈکوارٹر قلات سے ہوا جو شاہی بازار، ہسپتال روڈ، ہربوئی روڈ اور دربار روڈ سےہوتے ہوئے واپس لیویز ہیڈکوارٹر پر اختتام پذیر ہوا۔
احتجاجی اہلکاروں نے ہاتھوں میں پلے کارڈز اٹھا رکھے تھے جن پر “لیویز فورس کا پولیس میں انضمام نامنظور” اور “لیویز فورس زندہ باد کے نعرے درج تھے۔
ریلی کے دوران لیویز فورس کے افسران و جوانوں نے خطاب کرتے ہوئے کہا کہ لیویز فورس ایک 142 سال پرانی مثالی فورس ہے جس نے امن و امان کے قیام میں نمایاں کردار ادا کیا ہے۔ ان کا کہنا تھا کہ لیویز کے جوانوں نے وطنِ عزیز کے تحفظ کے لیے اپنی جانوں کے نذرانے پیش کیے ہیں۔
مقررین نے مزید کہا کہ ماضی میں بھی لیویز فورس کو پولیس میں ضم کرنے کی کوشش کی گئی جو ناکام ثابت ہوئی۔ اب ایک بار پھر وہی غلطی دہرائی جا رہی ہے۔
لیویز اہلکاروں نے حکومت بلوچستان سے مطالبہ کیا کہ عدالتِ عالیہ کے اسٹے آرڈر پر فوری عملدرآمد کو یقینی بنایا جائے اور لیویز فورس کے انضمام سے متعلق جاری نوٹیفکیشن کو واپس لیا جائے۔