کوئٹہ : ہیومن رائٹس کمیشن آف پاکستان کے چیئرمین اسد اقبال بٹ کی قیادت میں ایچ آر سی پی کے ایک وفد نے وائس فار بلوچ مسنگ پرسنز کے احتجاجی کیمپ کا دورہ کیا۔
اس دوران وفد نے وی بی ایم پی کے چیئرمین نصراللہ بلوچ اور بلوچستان سے جبری گمشدگی کا نشانہ بننے والے افراد کے لواحقین سے ملاقات کی۔
ایچ آر سی پی کے اس وفد میں چیئرمین اسد اقبال بٹ کے ہمراہ وائس چیئرمین منزہ جہانگیر، سعیدہ بلوچ، حبیب طاہر، کاشف پانیزئی، عارفہ نور ملک اور فرید شاہوانی شامل تھے اس موقع پر لاپتہ عبدالغنی اور محمود علی لانگو سمیت دیگر لاپتہ افراد کے لواحقین بھی کیمپ میں موجود تھے۔
وائس فار بلوچ مسنگ پرسنز کے چیئرمین نصراللہ بلوچ نے وفد کو بلوچستان میں انسانی حقوق کی خلاف ورزیوں اور خصوصاً جبری گمشدگیوں کے حوالے سے بریف کیا کہ رواں سال ملکی اداروں نے جبری گمشدگیوں اور لاپتہ افراد کو ماورائے قانون قتل کرنے کے سلسلے میں تیزی لائی ہے۔
چیئرمین نصراللہ بلوچ نے وفد کو بلوچ خاتون طالبہ ماہ جبین کی جبری گمشدگی کے حوالے سے بھی آگاہ کیا، انہوں نے وفد کو بتایا کہ چالیس دن گزرنے کے باوجود بھی بلوچ طالبہ کو کسی عدالت میں پیش کیا گیا ہے اور نہ ہی انکے حوالے سے انکے خاندان کو معلومات فراہم کیا جارہا ہے۔
وفد میں شامل ہیومن رائٹس کے سینئر رہنماؤں نے لاپتہ افراد کی عدم بازیابی، جبری گمشدگیوں میں تیزی، لاپتہ افراد کی ماورائے قانون قتل اور ماہ جبین کی جبری گمشدگی پر تشویش کا اظہار کیا۔
وفد نے یقین دھانی کرائی کہ ہیومن رائٹس کمیشن آف پاکستان بلوچستان میں ہونے والے ان انسانی حقوق کی خلاف ورزیوں کے خلاف وفاقی اور صوبائی حکومت سمیت ہر فورم پر آواز اٹھائے گی۔