شال ( ویب ڈیسک ) بلوچستان ہائی کورٹ نے بلوچ یکجہتی کمیٹی کی سربراہ ڈاکٹر ماہ رنگ بلوچ کی گرفتاری کے خلاف دائر درخواست سماعت کے لیے منظور کر لی ۔
بعد ازاں عدالت نے ماہ رنگ سے رشتہ داروں اور وکلا کو ملنے کی بھی اجازت دے دی۔
جسٹس روزی خان بڑیچ اور جسٹس شوکت علی رخشانی پر مشمل بلوچستان ہائی کورٹ کے دو رکنی بینچ نے یہ حکم ماہ رنگ بلوچ کی بہن نادیہ بلوچ کی جانب سے دائر درخواست پر سماعت کرتے ہوئے دیا۔
حبیب طاہر، عمران بلوچ، خالد کبدانی اور مزدفلہ اچکزئی کے توسط سے دائر درخواست میں نادیہ بلوچ نے مؤقف اختیار کیا تھا کہ ماہ رنگ بلوچ کو بغیر کسی وجہ کے تھری ایم پی او کے تحت گرفتار کیاگ یا ہے جو آئین کے آرٹیکل 15، 16 اور 19 کی خلاف ورزی ہے-
عدالت نے ماہ رنگ بلوچ کی گرفتاری کے خلاف دائر درخواست سماعت کے لیے قبول کرتے ہوئے پاکستان و بلوچستان محکمہ داخلہ، آئی جی پولیس سمیت دیگر کو نوٹسز جاری کردیے۔