خضدار ( مانیٹرنگ ڈیسک) بلوچستان کے علاقہ خضدار نال میں پاکستانی فوج کی تشکیل کردہ ڈیتھ اسکواڈ کے علاقائی سرغنہ صمد سمالانی کی گاڑی میں دھماکہ ہوا ،
جس کے نتیجے میں 4 افراد ہلاک اور 5 زخمی ہوگئے۔ جبکہ وہ خود اس حملے میں محفوظ رہے ۔
ہلاک افراد میں عبیداللہ ولد لعل بخش اور منیر احمد ولد عبدالغنی کی شناخت ہوئی ہے تاہم دو کی شناخت باقی ہے۔
بم دھماکہ کی آواز اتنی زوردار تھی کہ پورا علاقہ لرز اٹھا اور دھماکہ کی آواز دور دور تک سنی گئی۔
خضدار کی انتظامیہ کے ایک اہلکار نے اس واقعہ کی تصدیق کرتے ہوئے بتایا کہ صمد سمالانی اپنی گاڑی کو ویلڈنگ کی دکان پر مرمت کرا رہے تھے عین اسی وقت گاڑی کے اندر رکھے مواد سے دھماکہ ہوا جس کے نتیجے میں 4افراد ہلاک اور 5 افراد زخمی ہوئے۔
دیگر ذرائع کا کہنا ہے کہ دھماکہ گاڑی میں سلنڈر پھٹنے کی وجہ سے ہواہے ۔
ڈپٹی کمشنر خضدار یاسر اقبال دشتی نے بتایا کہ واقعہ کے فوراً بعد لیویز جائے وقوعہ پہنچ گئی جب کہ فائر بریگیڈ ٹیم نے فوری طور پر جاکر آگ بجھادی۔
ڈپٹی کمشنر کے مطابق زخمیوں میں سے ایک کو ٹراما سینٹر لے جایا گیا جب کہ دیگر کو مقامی ہسپتال شفٹ کیا گیا جنہیں خضدار لانے کے انتظامات کیے جارہے ہیں۔
دھماکے بارے تحقیق جاری ہے ۔