خضدار ،جھاو ، لاہور ( مانیٹرنگ ڈیسک ،نامہ نگاراں ) پاکستانی فورسز خفیہ اداروں نے بلوچستان کے علاقہ خضدار ،جھاؤ اور پنجاب لاہور سے پاکستانی خفیہ اداروں نے 2 بلوچ طلباء سمیت 4 افراد کو حراست میں لے کر لاپتہ کردیا ۔
تفصیلات کے مطابق پاکستانی صوبے پنجاب سے اطلاعات ہیں کہ رات گئے پاکستانی فورسز اور پولیس خفیہ اداروں نے لاہور میں طلباء ہاسٹل پر چھاپہ مار کر بلوچستان کے رہائشی لاہور یونیورسٹی کے طالب علم اکرام مینگل اور سپیریئر یونیورسٹی لاہور کے طالب علم شمریز بادینی کو غیر قانونی چھاپہ مارکر حراست میں لیکر نامعلوم جگہ منتقل کر دیا-
بلوچ طلباء کی جانب سے پاکستانی فورسز اور پنجاب پولیس کے ہاتھوں دونوں نوجوان طلباء کی جبری گمشدگی کے ویڈیو فوٹیج بھی شائع کیا گیا ہے، جہاں پنجاب پولیس اور سول کپڑوں میں ملبوس مسلح افراد انھیں گھسیٹ کر لے جارہے ہیں۔
ذرائع کے مطابق پاکستانی فورسز نے اکرام مینگل کو چھوڑ دیا ہے جبکہ شمریز بادینی تاحال لاپتہ ہے ۔
ادھر بلوچستان کے ضلع خضدار سے اطلاعات ہیں کہ گذشتہ روز صبح11 بجے کے قریب پاکستانی فورسز نے خضدار کوڑاسک کے مقام سے مسلم ولد اختر سمالانی نامی نوجوان کو حراست میں لیکر نامعلوم مقام پر منتقل کردیا ہے۔
اس طرح ضلع آواران تحصیل جھاؤ کے مرکزی بازار سے اطلاعات ہیں کہ پاکستانی فورسز نے علی محمد نامی دکاندار کو ان کے دکان سے حراست میں لیکر جبری لاپتہ کردیا ہے۔