جنیوا(مانیٹرنگ ڈیسک)اقوام متحدہ نے کہاہے کہ غزہ کی پٹی کے جنگ سے متاثرہ لوگوں تک امداد کی فراہمی کو یقینی بنانے کے لئے فوری اور موثر اقدامات کئے جائیںاور غزہ میں امداد کے داخلے کے راستے بھی کھولے جائیں ۔اقوام متحدہ نے خبردار کیا کہ اگر غزہ کو فوری امداد فراہم نہ کی گئی تو اس کے نتیجے میں علاقہ کسی بڑے انسانی المیے سے دوچار ہوجائیگا۔اقوام متحدہ کی تین امدادی ایجنسیوں نے اسرائیل پر زور دیا کہ وہ غزہ کے شمال میں واقع اشدود کی بندرگاہ تک انسانی امداد کی فوری ترسیل کے لئے رسائی کی اجازت دے۔ورلڈ فوڈ پروگرام، یونیسیف اور ورلڈ ہیلتھ آرگنائزیشن کی طرف سے جاری کردہ مشترکہ بیان میں کہا گیا کہ غزہ کی محصور آبادی جنہیں غذائی قلت کے بڑھتے ہوئے خطرے کا سامنا ہے تک خوراک اور سامان کی ترسیل کا انحصار امداد کے داخلے کے لئے نئے راستے کھولنے پر بھی ہے۔بیان میں کہا گیا کہ غزہ کی سرحد سے 40 کلومیٹر شمال میں واقع اشدود کا استعمال امدادی اداروں کے لئے انتہائی ضروری ہے ، تنظیموں نے غزہ میں انسانی امداد کے بہا ئومیں بنیادی تبدیلی کا مطالبہ کیا۔اقوام متحدہ کی نے کہا کہ انسانی ہمدردی کے اداروں کو اس بندرگاہ کو استعمال کرنے کی اجازت دینے سے بہت زیادہ مقدار میں امداد بھیجی جائے گی اور پھر اسے ٹرکوں پر غزہ کے سب سے زیادہ متاثرہ شمالی علاقوں تک پہنچانے میں مدد ملے گی جہاں اب تک صرف چند قافلے ہی پہنچ پائے ہیں۔