لسبیلہ ( اسٹاف رپورٹر سے )
بلوچ اسٹوڈنٹس فرنٹ اوتھل زون کے ترجمان نے اپنے جاری کردہ بیان میں کہا کہ لسبیلہ جامعہ کی ناقص کارکردگیوں، غفلتوں سے طلباء کو مشکلات کا سامنا ہے، ان کو تمام بنیادی سہولیات سے محروم کیا گیا ہے، طلباء کے تدریسی عمل رکنے کے ساتھ ساتھ انہیں شدید مشکلات درپیش ہیں جوکہ یونیورسٹی انتظامیہ پر ایک سوالیہ نشان ہے
انہوں نے مزید کہا کہ لسبیلہ یونیورسٹی میں طلباء اور طالبات کی رہائش کیلئے ہاسٹلز کی تعمیر پر کروڈوں روپے خرچ کرنے کے نام پر فنڈز کو خورد برد کرکے گرلز کے لئے صرف ایک ہاسٹل تعمیر کی گئی ہے ۔
انھوں نے کہاکہ بلوچ طالبات کو رہائش کیلئے شدید مشکلات کا سامنا کرنا پڑ رہا ہے، بہت سے طالبات اوتھل بازار میں کرائے کے کمروں میں رہائش پزیر ہیں، اسکے علاوہ بوائز ہاسٹل کو ندی نالوں کے قریب تعمیر کیا گیا ہے ۔ لیکن وہاں پانی کی نکاسی کیلئے کوئی خاص انتظامات نہیں کئے گئے ،
جہاں حالیہ سیلابی ریلے سے ہاسٹلز کے اندر پانی اور کیچھڑ جمع ہوئی ہے، کمروں کے پنکھے خراب ہیں اور وہاں شدید بدبو آ رہی ہے، ابھی تک ٹرانسپورٹ سسٹم غیر فعال ہے،
لیکن ہاسٹلز کی صفائی کیلئے ابھی تک انتظامیہ کی طرف سے کوئی اقدام نہیں اٹھایا گیا ہے، ہاسٹلز کے اندر بنا پنکھوں اور صفائی کے انتظامات نہ ہونے پر مچھروں کی بھرمار سے طلباء بیماری میں مبتلا ہیں، اس گھمبیر صورتحال پر انتظامیہ کو آگاہ کرنے کے باوجود نہ صفائی کیلئے اقدام اٹھایا گیا ہے اور نہ ہی مچھروں کی روک تھام کیلئے اسپرے کی گئی ہے، گرلز ہاسٹل کو بند کیا گیا ہے طالبات کو شدید مشکلات کا سامنا ہے۔
انہوں نے اپنے بیان کے میں یونیورسٹی انتظامیہ پر زور دیتے ہوئے کہا کہ گرلز ہاسٹل کو طالبات کیلئے فوری طور پر کھول کر ہاسٹل کے میس کو بحال کیا جائے۔
جبکہ بوائز ہاسٹل میں صفائی کا انتظام کرکے انہیں پنکھے اور تمام بنیادی سہولیات فراہم کرنے کے ساتھ ساتھ مچھروں کی روک تھام کیلئے یونیورسٹی احاطے کے اندر اسپرے کیا جائے اور ٹرانسپورٹیشن کو بھی بحال کیا جائے تاکہ طلباء و طالبات بنا کوئی پریشانی اپنے تدریسی عمل کو جاری کرسکیں، بصورت دیگر ہم شدید احتجاج کرینگے۔
