مستونگ مظاہرین سیلاب سے متاثرہ علاقوں کی بحالی و امداد کی فراہمی کا مطالبہ کرتے ہوئے کوئٹہ کراچی شاہراہ کو ایک بار پھر بند کردیا -
دھرنے میں خواتین و بچوں کی بڑی تعداد شریک ہے-
شاہراہ پر دھرنے کے باعث درجنوں گاڑیاں پھنس گئے ہیں ۔
متاثرین کا کہنا ہے کہ علاقے میں سیلاب و بارشوں کی تباہی کے باعث نظام زندگی درہم برہم ہوکر رہ گئی ہے ، علاقہ مکین بے گھر ہو چکے ہیں لیکن حکومت کی جانب سے نہ انہیں خیمے ملے ہیں اور نہ ہی کسی قسم کی خوراک اور ادویات فراہم کی گئی ہے ،سیلاب اور بارشوں کے بعد ہمارے بچے بھوک وافلاس سے دو چار ہیں-
مظاہرین نے کہا کہ انتظامیہ اتنے دن متاثرین کو بے یار و مددگار چھوڑ کر خواب غفلت میں سوئے ہوئے ہیں انھیں متاثرین کی کوئی فکر نہیں علاقوں میں نا بجلی ہے نا گیس نہ پینے کا صاف پانی، سیلاب سے گھر تباہ ہوئے لوگ کھلے آسمان تلے رہنے پر مجبور ہیں-
مستونگ سیلاب متاثرین گذشتہ کئی روز سے امداد کی فراہمی کا مطالبہ کررہے ہیں متاثرین اس سے قبل بھی کوئٹہ کراچی شاہراہ کو احتجاجی بند کردیا تھا تاہم بعد میں ایڈیشنل ڈپٹی کمشنر اور مظاہرین کے درمیان مذاکرات کے بعد دھرنا ختم کردیا گیا تھا-
مظاہرین کا کہنا تھا کہ وہ جھوٹی تسلیوں پر احتجاج ختم نہیں کرینگے اگر حکومت اور ضلعی انتظامیہ متاثرین کے مسائل حل کرنے میں سنجیدہ ہے تو پہلے کوئی پیش رفت کرکے دکھائیں-
آپ کو علم ہے بارشوں اور سیلاب سے بلوچستان کے تمام 36 اضلاع متاثر ہوئے حکومت کے مطابق بارشوں اور سیلاب سے بلوچستان میں 13 لاکھ سے زائد افراد بے گھر ہوچکے ہیں، 1 لاکھ 85 ہزار سے زائد مکانات یا تو گر گئے یا انہیں شدید نقصان پہنچا ہے۔ بلوچستان میں گذشتہ دنوں ہونے والے بارشوں سے کئی علاقوں میں اب تک معمولاتِ زندگی بحال نہیں ہوسکی ہیں ۔مگر پھر طوفانی بارشوں کا سلسلہ متاثرہ علاقوں میں شروع ہو چکاہے ۔
ضلع لسبیلہ کے پہاڑی علاقے کنراج کے مختلف علاقوں سمیت تحصیل اوتھل اور تحصیل سونمیانی وندر کے پہاڑی علاقوں دودر پیر ،بکھر ساند شم تار اڈے سمیت دیگر مقامات پر موسلادھار بارشوں کی وجہ سے پہاڑی ندی نالوں میں سیلابی ریلوں کے باعث طغیانی کے سبب وندر ندی میں کورود کے مقام پر سیلابی ریلوں کے گزرنے کی وجہ سے اور ندی پر پل کے نہ ہونے کے باعث کیمپ ٹو مارکیٹ روڈ ٹریفک کی آمد ورفت کے لیے بند ہوگیا ہے ۔
جس کے باعث سب ڈویژن کنراج سمیت تحصیل اوتھل کے علاقے پیر بکھر ساند و دیگر کا زمینی رابطہ مکمل طور پر ایک مرتبہ پھر منقطع ہوگیا ہے ۔
