ڈیرہ غازی خان( اسٹاف رپورٹرز سے )بلوچ راج کے مرکزی ترجمان نے بیان دیتے ہوئے کہا کہ حالیہ دنوں ہونے والی طوفانی بارشوں کی وجہ سے کوہ سلیمان، تونسہ شریف، ڈیرہ غازی خان اور راجن پور کے شہر سمیت سینکڑوں گاؤں مکمل طور پر سیلاب کی نظر ہو چکے ہیں ،جس کی وجہ سے درجنوں انسانوں کی اموات واقع ہوئی جو کہ ایک بڑا سانحہ ہے۔
انھوں نے کہاہے کہ اتنے بڑے انسانی المیہ جہاں لاکھوں لوگوں کے گھر بار سب کچھ تباہ و برباد ہوگیا اور لوگ اپنے بال بچوں سمیت کھلے آسمان تلے زندگی کے دن گن رہے ہوں وفاقی و بلوچستان حکومت کی جانب سے تباہ شدہ علاقوں پر کسی بھی قسم کی توجہ نہ دینا علاقہ مکینوں کے ساتھ انتہائی زیادتی ہے۔
انہوں نے کہا جہاں سینکڑوں دیہاتوں کے مٹ جانے اور موسم کے زیادہ بگڑنے کا علم ہونے کے باوجود ان علاقوں کو آفت زدہ قرار نہ دینا اور ساتھ ساتھ کسی بھی قسم کے ہنگامی بنیادوں پر انتظامات نہیں کرنا انتہائی افسوس ناک عمل ہے ۔
ترجمان نے کہا ،مشکل کی اس گھڑی میں اپنے لوگوں کی بزگی ،بےوسی اور لاچاری کی حالت زار کو دیکھتے ہوئے بلوچ راج تمام طلبا تنظیموں، مذہبی اور فلاحی اداروں، نیشنل اور انڑنیشنل این جی اوز کے ساتھ ساتھ مخیر حضرات سے اپیل کرتی ہے کہ بلوچ راج کی طرف سے ہونے والی ان امدادی سرگرمیوں میں مکمل تعاون کرتے ہوئے انسان دوستی اور قوم دوستی کا ثبوت دیں۔
انھوں نے ڈیرہ غازی خان کے غیور نوجوانوں سے بھی اپیل کی ہیں کہ امدادی سرگرمیوں میں بھرپور حصہ لیتے ہوئے اپنا اپنا انسانی فرض نبھائیں ۔
