وھدےکہ یک زوراکیں مُلکے وتی نزیکیں ھمساھِگیں مُلکے ءِ ایردست کنگ مراسا تیار کنت گُڑا چہ دْرستاں پیش ھمے کمزوریں مُلک ءِ نزوریاں چار ایت، اول آ راج ءِ تہ ءَ راجدْروھاں درگیج ایت کہ اُرش ءِ وھد ءَ من ءَ کُمک بہ کن اَنت ءُ ماں یک ناشناسیں ڈیھے ءَ وتی جنگی لشکراں چہ راجدوستیں گھگیراں رکین آں۔ کمزوریں مُلک ءِ سر ءَ وتی ایردستی ءِ برجاہ دارگ ءِ ھاتر ءَ گُلامیں راج ءِ تہ ءَ دمگی کاسگ چٹّانی ودی کنگ ءُ لس مھلوک ءِ دپچٹ کنگ ءِ ھاتر ءَ وڑ وڑیں گاماں زور ایت۔ ایردستیں راجانی رواج، دود، ربیدگ ءُ زُبانانی لگتمالی ءَ انچیں بے سمائیں پندالاں ساز ایت کہ لس مھلوک سرپد نہ بیت کہ ما گُلام جوڑ بوگ ءَ ایں، ایردستیں راج ءِ تہ ءَ تھی جیڑھاں یکشل ءَ ودی کنان ءَ راج ءَ بھر ءُ بانگ کنائین ایت چریشی ءَ راج وت ماں وت کشاں چیل بیت۔ راج ءِ زھگیں نودربر بے آسراتی ئیں وانگجاھاں زورگِر ءِ ردیں درونتاں وانان ءَ وتی جِند ءِ راجی بستار ءُ ارزِشت ءَ بے ھیال بنت چمیشکا سرجمیں راج کم کم ءَ یک مجگی گلامے جوڑ بیت۔
اگاں ھورت چار ئے گُڑا سرپد بَہ ئے کہ گوں بلوچ راج ءَ ھم انچوش بوت ءُ انگت ءَ راج ءِ ھلاپ ءَ ھمے وڑیں پندل ساز بوگ ءَ اَنت۔ بلوچ راج ءِ دُژمن ءَ 28 مارچ 1948 ءَ بلوچستان ءِ سر ءَ اُرش کنگ ءَ پیسر بلوچ راج ءِ تہ ءَ دمگی سردار، میر ءُ نواباں لب ءُ لالچ دیان ءَ بھا زُرت اَنت پمیشکا ما گِند ایں کہ 1948 ءَ شھزادگ ابدلکریم بلوچ ءِ سرکماشی ءَ اولی بلوچ راجی آجوئی ءِ سِلاھبندیں جُھد ءَ ھمے دمگی نواب، میر ءُ سرداراں بلوچ راجی گھگِری ءَ ناں وت بھر زورت ءُ نَیکہ وتی دمگی بلوچاں گْوشت اش کہ پہ وتی آجوئی ءَ پاد بَہ اِت ءُ شھزادگ ابدلکریم ءِ کاروان ءَ ھوار بہ اِت۔ گِند ئے پہ دُژمن ءِ پائدگاں ھمے دمگی میر ءُ نواباں بلاھیں بلوچ راج بھر ءُ بانگ کنان ءَ چہ سرجمیں راجے ءَ ماں کسانیں ٹَکاں ونڈ ءُ چُنڈ کُتگ اَنت۔ نی بچار کہ کسے وت ءَ مینگل ءُ کسے وت ءَ رئیسانی، لانگو ءُ بُلیدی گْوش ایت، کسے وت ءَ کھوسہ، لیگاری، بُزدار، مری ءُ گیشکوری گُڑا کسے وت ءَ بُگٹی، مگسی ءُ رِند گْوش ایت کسے جمالی اِنت ءُ کسے مزاری۔
گِند ئے اے سرجمیں راج پہ دُژمن ءِ سیت ءُ پائدگاں ماں دمگی راجدْرہ ءُ کاسگ چٹّانی دست ءَ بھر ءُ بانگ انت چمیشکا اے وت ءَ اول بلوچ نہ لیکھ اَنت اگاں ایشاں وت ءَ بلوچ بہ منّ اتیں گُڑا اے دْراہ بلوچاں بابو نوروز ھان زھری ءِ سرکماشی ءَ 1958-59 ءِ بلوچ راجی جنگ ءَ ھوار بوتگ اِت اَنت اگاں ھمے دمگی وتگڑیں سردار، میر ءُ نواباں کمیں بلوچیت ءُ راجدوستی ءِ مارشتے بوتیں گُڑا ایشاں 1973-78 ءِ بلوچ راجی آجوئی ءِ سِلاھبندیں جُھد ءَ بابا ھیربکش مری ءُ اتا اُلہ مینگل بے کُمک ءُ بے ھمراھدار نہ کُتگ اَت اَنت، اگاں ھمے لگوریں سردار ءُ میر وت جنگ ءِ بھر بوھگ ءَ تُرسگ ءَ اِت اَنت گُڑا باید اِنت وتی ٹَک ءِ بلوچاں بہ گْوشتین اش کہ برو اَنت ءُ بابا ھیر بکش مری ءِ سرکماشی ءَ بلوچ راجی آجوئی ءِ سِلاھبندیں جنگ ءَ ھوار بہ بَہ اَنت۔ بلے اِنّاں پرچا کہ اے دْراہ پنجابی ءِ کاسگ چٹّ اِت اَنت، ایشاں پنجابی ءِ لب ءُ لالچ رسگ ءَ اَت گُڑا ایشاں چون بلوچ راجی آجوئی ءِ بھر بہ زُرتیں یا کہ وتی ٹَک ءِ بلوچاں بہ گْوشتیں کہ راجی جنگ ءَ ھوار بَہ اِت۔
ھمے وڑ ءَ داں روچ مرچیگ ءَ وتگڑیں دمگی میر ءُ سردار ءِ وڑیں کاسگ چٹّاں بلوچ راج بھر ءُ بانگ داشتگ اَنت۔ بزاں یک پنجابی ءِ وڑیں درآمدیگیں زُبان، دود ءُ ربیدگی زورانسرے ءِ پوج چون راج ءِ دمگ، میتگ، کوہ ءُ کوچگاں بلوچ راج ءِ تْرُندیں چیرجنگ ءَ داشت کنت؟ وھدے کہ ھمے زورانسر ءِ پوج بلوچ کوہ، دمگ ءُ میتگاں وت ناشناس اِنت؟ گِند ئے پہ وتی بْراتانی کُشائینگ ءَ ما بلوچ راج ءِ ھمے راجدْروھیں بدبھت وت پنجابی پوج ءَ رھشُونی ءَ کنان ءَ کوہ ءُ کوچگاں سر کنگ ءَ ایں، بلوچ میتگانی ماندارگ، راجی سرمچار ءُ رھشُونانی شھیدی، زالبولانی کم شرپی ءُ ورنایانی گار ءُ بیگواھی ءَ مئے راجدْروھانی دست مان اِنت چے ءَ کہ اے چکوال ءُ ساھیوال ءِ تینّو مینّواں مجال اِنت کہ کُنگریں بلوچ سرمچارانی دیم ءَ بہ اوشت اَنت۔ اگاں روس، امریکہ ءُ نیٹو چیرجنگ ءِ ھرچگاں برداش کُت نہ کن اَنت گُڑا اے پنڈوکیں پنجابی چہ کُجا یک گْوریلہ جنگے برداش کنت۔
پرچاکہ ما بلوچ ناتپاک ایں، وتگڑیں دمگی میر ءُ سردار پنجابی ءِ ٹوھیں آسراتی اَنت نی باید انت بلوچ راجی لشکر راج ءِ لس وانِندگیں ورنایاں وتی سِلاھبندیں گلاں ھوار کنائینگ ءِ جُھد ءَ بہ کن اَنت کہ دمگی میر ءُ سرداراں ھوار راجدْروھاں پْروش دیگ بِہ بیت۔ وھدے کہ ھمے دمگی میر ءُ سرداراں پْروش بیتگ گُڑا پنجابی دُژمن ءَ ھم الم پْروش دیگ بیت، راج وتی ڈیھ ءِ وتواجہ بیت ءُ آزات وتواجھین ءُ راجمستریں بلوچستان ھم دیمروئی کنت۔
بلوچ شالا یکمُشت ءُ وت ماں وت ھمکوپگ بات، بلوچستان شالا آجوئی بہ بات۔
