مشکے:نوکجو ءَ گوستگیں روچاں پاکستانی کشندہ ٹولی ءِ ھندی سروک دینو ء ابراھیم ءِ کارمنداں زھور ء اُمر، مستپا ء اُمر، نئیم ء نورا ءُ نسراللہ ء سوالی ءَ شھید یارجان، شھید مھراللہ، بابو شاھنواز ءُ ماسٹر لال بکش ءِ گساں بیڑ برتگ، گس پروشتگ ءُ گسانی گرانھادین سامان دُز اِتگ اَنت۔
زْرمبش اھوالکار ءِ رد ءَ اے کھول مدام پاکستانی لشکر ءِ زوراکیانی نشانگ بیگ ءَ اَنت۔ 24 مارچ ءِ سھب ءَ پاکستانی لشکر ءَ یار جان ء ھُدا بکش پُچڑ ءِ کور ءَ دگ ءِ سر ءَ تیرگواری کرتگ ءُ شھید کرتگ اَت، بیگاہ ءَ آئی ءِ لاش گِس ءَ آرگ بیتگ اَت، پاکستانی لشکر آئی ءِ گِس ءَ بیڑ بارت ءُ آئی برات مھراللہ ء ھُدا بکش ءَ زورانسری آوار جنت۔ پہ مھر اللہ ءِ رکینگ ءَ گس ءِ زھگ ءُ جنین گھگیری کن اَنت گڑا پاکستانی لشکر زھگ ءُ جنیناں لَٹ شاپ ءُ آیانی سر ءَ تیرگواری کنت۔ پاکستانی لشکر ءَ مھر اللہ زورانسری آوار جنگ ءَ پد دیم پہ وتی بنجل ءَ روگ ءَ بیت کہ نیمراہ ءَ شھید ئے کنت ءُ آئی ءِ لاش ءَ مشکے ءِ گجر ءَ دور دنت۔
بنشون ءِ رد ءَ یار جان ء ھُدا بکش ءِ شھید کنگ ءَ پاکستانی لشکر ءَ ھندی کشندہ ٹولی ءِ کارمند اُبید اللہ ء گاجو اکبر ءُ بندو ء لکو ھوار بیتگ اَنت۔ چہ ایشی ءَ پیش شھید یار جان ءُ شھید مھر اللہ ءِ مستریں برات کاسم ءُ آئی ءِ زامات اَئید مھمد ھزادار ءَ پاکستانی کشندہ ٹولی ءِ کارمنداں 23 اکتوبر 2012 ءِ بیگاہ ءِ ادار 6:45 شھید کرتگ اَنت۔ کاسم ءُ ائید مھمد ءَ پاکستانی لشکر ھما وھد ءَ شھید کنت کہ آ ھزدار بازار ءَ روگ ءُ واتر وتی گس ءَ آھگ ءَ بنت۔ کشندہ ٹولی ءِ کارمند آیاں سول کالونی ءِ مزنیں دروازگ ءُ وانگجاہ ءِ دیم ءَ شھید کن اَنت ءُ تچکی ءَ پاکستانی لشکر ءِ بنجل ءَ پتر اَنت۔
بنشون ءِ رد ءَ پاکستانی کشندہ ٹولی ءِ کارمند پہ اے کھول ءِ لڈینگ ءَ شھید یار جان ءُ شھید مھر اللہ ءِ شھیدی ءِ دوماہ ءَ پد آیانی دکان کہ گِس ءِ کِر ءَ بیت، کشندہ ٹولی ءِ کارمند روچ ءِ رھمانی دکان ءَ پروش اَنت ءُ مردماں پہ لَڈ ءُ بار کنگ ءَ بیھار دے اَنت۔ پاکستانی لشکر ءُ ھندی کشندہ ٹولی ءِ کارمندانی زوراکیانی سوب ءَ اے مردماں سے چار سال پیش وتی گِس ءُ جاگہ یلہ داتگ ءُ بلوچستان ءِ آدگہ جاھاں آواران ءُ ھزدار ءَ شتگ ءُ جھمنند اَنت۔ اے کھول چہ وتی ترس ءَ اے گپ ءَ رسانکدر ءَ شنگ کنگ ءَ نہ اَنت۔
یات بہ بہ اِت کہ مشکے ءِ تہ ءَ پاکستانی لشکر ءُ ھندی کشندہ ٹولی ءِ کارمندانی زوراکیاں سک دیر اِنت کہ زوراکی اِش برجاہ اِنت۔ مشکے ءِ وڑیں کسانیں جاھے ءَ سد ءَ گیش مردم پاکستانی لشکر ءُ ھندی کشندہ ٹولی ءِ کارمندانی دست ءَ شھید کنگ بیتگ، مشکے ءِ شھیدانی تہ ءَ شش ءُ ھپت جنین اَنت۔
ھمے وڑ ءَ جنوری 2021 ءَ مالدار ھکیم جھمنند جکو مشکے ءِ کھول ءِ سَے جنین پاکستانی لشکر ءِ کارمند ءُ آئی ءِ چیردستی ءَ برجاھیں ھندی کُشندہ ٹولی ءِ کارمنداں شیرا ء اھمد، ھداداد ء ابدالکریم ءُ آدگراں بدکاری ءِ نشانگ کرتگ اِت اَنت۔
