دنیا نا تہٹی جنگ آک ہچ بر ایسر مفسہ ، دا ہندونو گواچن ئسے کہ داڑان تینا مونے ہڑسنگ مفک ، انتے کہ جنگ لازمی ئے ، جنگ کروئی ئے جنگ مریک نی مریسہ اگہ جنگ متو ، نی مفیسہ ، جنگ متو ، نے آں نا راج ، نا ڈغار ُپلنگیک ، نے آ ہر کس مُژدہ کیک ، نا مننگ کیں کس ہم تیار مفک ، ہمو وخت اسکاں کہ نی جنگ ئنا خلاف آ جنگ اس شروع کپیس ۔
یوکریں نا جنگ ئنا سوب آک اینو کُلے معلومو، یوکرین نا جنگ ئنا اصل مون اینو کس اسیاں ڈکوک افک ، ایلو نیماغا روس ئنا جلہو نا وجہ آک ہم پاشو ، جنگ ئنا اصل وجہ دادے کہ روس مرے یاکہ پین امرو ہم ڈیہہ اس اونا اگہ دو رسینگے او ہچبر داگڑائے منہپَک کہ اوڑکیں اسے ڈیہہ ئس خطرہ جوڑ مرے ، اوڑاں مُستی دو خسے ، اینو انسانی اخس ہم جان یوکرین اٹی ہِننگ ئٹی ئے ، اونا وجہ سیاسی مثلہ ئے ۔ سیاست اراٹے ہم اصل دروشم ئٹی بس اوڑے جنگ مریک ۔
روس ءُ یوکرین نا رہبر آتا بیان بازی آن پد روس یوکرین نا زی آ جلہو کرے ، اوٹی باز ایہونو بندغ کسک ءُ ٹپی مس ، ہزار آتا کچ ئٹ اُراک تباہ مسور ، لکھ آتا کچ ئٹ عام بندغ آک تینا اراتاں در پہ در مسور، لکھ آتا کچ ئٹ بندغ آک ڈیہہ آن در پہ در مس ،لکھ آتا کچ ئٹ بندغ آتے کشنگ مرنگ ئٹی ئے ۔
دا کُل گڑاتے آن مُہٹ ننے دا گڑا سمجھوئی ئے کہ روس انتے جلہو کرے ، یوکرین نا زی آ روس ئنا دا اولی جلہو افک داکاں مُہٹ ہم جلہو کرینے ، سال (ارا ہزار ءُ چاڑدہ ) 2014 ٹی بندغاتا مُچی آتے آن پد ، ہمو مُچی کہ مہتر نا خلاف آ مس ، ( گوبشان) نومبر آ شروع مس ، تو داں تو تسکان جاری مروکا مُچی ، جنگی میدان نا دروشم اسے ٹی بدل مس اوڑے 130 بندغ کسک ،ہزار آک ٹپی مسور ۔
ہمو سال اٹی روس یوکرین نا خلاف آ ، باغی تے کُمکے شروع کرے ءُ یوکرین نا زیا جلہو کرے ، اوڑے یوکرین نا صوبہ ، لوہناسک ءُ ڈونیٹسک آ قوضہ کرے ، اوڑے روسی ہمایت یافتہ باغی ءُ یوکرینی فوج ئنا دے اینو اسکان جنگ جاری ئے اوٹی چاڑدہ ہزار عام بندغ خلنگ مسونے ، موہان نا ہفتہ گوبشان ( فروری ) 2022 ٹی ، صدر پیوٹن لوہانسک ءُ ڈونیٹسک ئے آزاد ریاست قرار تِس ، بیانی بازی شروع مس ، روس تینا اِرا لکھ فوجی ہیس سیمسر آ سلیفے ، او پدا روس جلہو شروع کرے مُستی بریسا قوضہ کرنگے شروع کرے ۔
اصل ئٹی روس ہچ منیپک کہ یوکرین دفاعی اتحاد نیٹو (Nato) North Atlantic Treaty Organization نا اسے حصہ ئس جوڑ مرے ، روس ئے ہندا خلیس ئے کہ وخت ئس یوکرین نیٹو نا حصہ جوڑ مس کنا طاقت ئے باز خطرہ مریک ۔ کنے اوڑا جلہو کرنگ کیں دنیا الیپک ، دا گڑائے بیرا روس کرنگ ئٹی افک ، ہر ڈیہہ ئنا کوشست ہندادے کہ او تینا دشمن ڈیہہ ئے مونا برنگ کیں اِلیپ ۔
اینو یوکرین ءُ روس ئنا مثلہ انت ئس ہم مرے ، جہان بائدے کہ انسانیت نا گپے کے، روس ئنا مونا سلے ، روس ئے حیوان ءُ ناسرپد ءَ چنا تا خلنگ کیں اِلیپ ، روس ئے اِلیپ کہ او بے گناہ آتے خلے ، روس ئے الیپ کہ یوکرین ئٹی دا کچ اٹ بارود نا استعمال کے، دنیا ئے انسانیت نا بائدے کہ خیال مرے ، اول ہندادے کہ انسانیت نا زبان ئٹ روس ئے سلیفے اگہ روس سلیتو، روس ارا ہم مزاج ءُ زبان ئٹ سرپد مریک ہمو حساب ئٹ سلیفے تا ۔
یوکرین نا بندغ آک توفک ہرفینو او چکنو چکنو ٹولی تے ٹی دفاعی برگیڈ تیار کرینو ، اوفتا پارنگ ہندادے کہ نن روس اتوں مرنگ کیں تیار افن ، نن جنگ کینا ، یا کہینا یا خلینا ، دونا جزبہ آتے تاریخ ہچبر اُستان دپک ، روس اتوں ہر کُنڈان مزاہمت کرنگ ئٹی او ، تینا وطن نا حفاظت کرنگ کیں تیارو۔
یوکرین نا ہمو مخلوق ءُ رہبر آتے سلام پاوہ کہ ارا تینا وطن ءُ راج اکین جنگ کرنگ ئٹی او ، فدائی نا دروشم اٹ تینے قربان کریساٹو ، تینا جان تا پرواہ تخپریساٹ ، اینو او اسے دشمن اسے نا مونا سلوکو جنگ کرنگ ئٹی او ، ارا بندغاک کہ اینو یوکرین آن پیشمنگ ءُ نرنگ نا بدل آن توفک ہرفینو جنگ کرنگ اٹی او ، او دنیا ئے اسے پوسکونو رنگ اس ءُ سبخ اس ترنگ ئٹی او ، کہ راج ئنا زی آ ارا وخت سختو حالت برے گڑا راجے یلہ ترنگ نرنگ نا بدل آں ،جوانے کہ بندغ آک جنگ کیر جان ہیتر ۔
شکریہ ڈیلی سنگر )
