*مند: پاکستانی لشکر ءَ ھشت مردم بیگواہ کتگ، پنچ پد ءَ یلہ داتگ سَے انگت بیگواہ اِنت*
Nov 04, 2021
پاکستانی لشکر ءَ مند ءَ ھشت مردم آوار جنی ءَ پد بیگواہ کتگ کہ ایشانی تہ ءَ پنچ مردم یلہ کتگ ءُ سَے انگت ءَ بیگواہ اِنت۔
سربوتگیں ھالانی رِد ءَ گوستگیں روچ ءَ مند ءُ دشت ءِ میان ءَ کوھی 
دمگ بانسر، کلّکور، ننگاور ءَ پاکستانی لشکر ءَ راہ ءُ در بستگ بوتگ اَنت ءُ مزنیں کچے ءَ لشکر کشی کتگ-
ھمے لشکر کشی ءِ میان ءَ پاکستانی لشکر ءَ ھشت مردم آوار جتگ ءُ گوں وت برتگ اَنت، اے ھشتیں مردم پاکستانی لشکر ءَ ھما وھد ءَ آوار جتگ اَنت کہ آ ھمے دمگ ءَ پکنک ءَ بوتگ اَنت-
پاکستانی لشکر ءِ دست ءَ آوار جنگ بوتگیں مردمانی پجّار سلمان ء ابدالرسول جھمنند گَوک، گُلزار ء بالاچ جھمنند گوبرد، آدل ء نادل جھمنند گوبرد، نئیم ء ندیم جھمنند گوک، باست ء سئید جھمنند گوک، ابید ء مجید جھمنند گوک ءُ دگہ دو مردمانی پجّار انگت نہ بوتگ-
اِھوالکارانی رِد ءَ آوار جنگ بوتگیں مردمانی لھتے پد ءَ شپ ءَ آجو بوتگ، وھدیکہ ایشانی ھمراھی ءَ آوار جنگ بوتگیں سلمان ء ابدالرسول ءُ گلزار ء بالاچ ءُ نئیم ء ندیم انگت بیگواہ اَنت-
دمگی مردمانی رِد ءَ پاکستانی لشکر ءَ دو روچ اِنت کہ کترینز ءِ راہ ءُ در بستگ اَنت ءُ نشتگ مردماں روگ ءَ آیگ ءَ نئیلگ ءَ اِنت-
زانگ بہ بیت بلوچستان ءِ گیشتریں دمگاں چُشیں روچے نہ گوزیت کہ پاکستانی لشکر ءِ زمینی ءُ بُرزی لشکر کشی برجاہ نہ اِنت، چُشیں روچے نہ گوزیت کہ زورانسری آوار جنی نہ بوگ ءَ اِنت-