کوئٹہ ( مانیٹرنگ ڈیسک )بلوچستان کے ضلع کیچ میں فوجی آپریشن میں مصروف پاکستانی فورسز کو مسلح افراد نے حملے میں نشانہ بنایا ہے۔
آمدہ اطلاعات کے مطابق تمپ میں پاکستانی فورسز کے اہلکار گذشتہ روز سے آپریشن میں مصروف ہیں۔ علاقے میں متعدد گاڑیوں پر مشتمل قافلوں سمیت پیدل اہلکاروں کی نقل و حرکت دیکھنے میں آئی ہے۔
آپریشن میں مصروف اہلکاروں کو گھات لگائے مسلح افراد نے کوھاڑ کے علاقے میں نشانہ بنایا ہے جس کے نتیجے میں اہلکاروں کو جانی نقصانات کا سامنا کرنا پڑا ہے۔
حملے کے بعد علاقے میں ایمبولنسز کی آمد و رفت دیکھنے میں آئی تاہم حکام نے تاحال اس حوالے سے کوئی تفصیلات فراہم نہیں کی ہے جبکہ علاقے میں فورسز کی جانب سے مسلسل مارٹر گولے فائر کیئے جارہے ہیں۔
علاوہ ازیں تربت اور مستونگ میں پاکستانی فورسز اور معدنیات لیجانے والی گاڑیوں کو مسلح حملوں میں نشانہ بنایا گیا ہے۔
تربت کے علاقے دیہات میں سی پیک روٹ پر قائم پاکستانی فورسز کے پوسٹ کو مسلح افراد نے حملے میں نشانہ بنایا ہے۔ حملے کے وقت متعدد دھماکوں کیساتھ شدید فائرنگ کی آواز سنی گئی ہے۔
علاقائی ذرائع کے مطابق حملے میں فورسز کو جانی اور مالی نقصانات کا سامنا کرنا پڑا ہے تاہم حکام نے اس حوالے سے کوئی موقف پیش نہیں کیا ہے۔
دریں اثناء مستونگ کے علاقے کھڈکوچہ میں مسلح افراد نے معدنیات لیجانے والی چھ گاڑیوں کو مسلح حملے میں نشانہ بنایا ہے۔
حملے میں نشانہ بننے والی گاڑیاں کرومائیٹ و دیگر معدنیات لیجارہے تھے۔ فائرنگ کے نتیجے میں گاڑیوں کو نقصان پہنچا ہے۔
خیال رہے گذشتہ روز بھی مستونگ کے علاقے چوتو میں معدنیات لیجانے والی دو گاڑیوں کو نشانہ بنایا گیا تھا جس کی ذمہ داری بلوچ لبریشن آرمی نے قبول کی تھی۔