کراچی : بلوچ یکجہتی کمیٹی (کراچی) کے ڈپٹی آرگنائیزر لالا وہاب بلوچ کی سربراہی میں بروز ہفتہ مغرب کے بعد لیاری آٹھ چوک سے کمانچر بلوچ کی یاد میں ایک ریلی کا انعقاد کیا گیا جس کے بعد شمعیں روشن کی گئیں۔ اس ریلی میں بہت سے لوگوں نے شرکت کی اور کمانچر کو خراج تحسین پیش کیا۔
انھوں نے اپنے خطاب میں کہا کہ کمانچر نہ فقط ایک فوٹوگرافر تھا بلکہ شئے مرید تھا جو ہانی کا دیوانہ تھا۔ عکس کشی تو بہت سے لوگ کرتے ہیں لیکن کمانچر بلوچستان سے عشق کو زندگی بخشی۔ مکران کو کوہ سلیمان کے ساتھ تصویروں کے زریعے تعارف کروانے میں کمانچر کا کردار ہے۔ ہم لیاری کے لوگ کہاں جانتے تھے کہ کوہ سلیمان میں بیہو نام کی بھی جگہ موجود ہے لیکن ہمارے لوگوں اور ہماری زمین سے ہمیں کمانچر نے متعارف کروایا۔
لالا نے کہاکہ ہم کمانچر کو کسی صورت فراموش نہیں کرسکتے کیوں کہ جب اتھل بیلہ میں سیلاب آیا تھا وہ کمانچر تھا جس نے بلوچ قوم کو جھنجھوڑا اور نصیر آباد بھی ہمیں کمانچر لے گیا تھا۔
انھوں نے کہاکہ کمانچر کو شئے مرید کا نام دیا اور کمانچر کے عشق کو وتن کے لئے سراہا۔ کل بروز اتوار ملیر صدیق گوٹھ میں مغرب کے بعد شمیں جلائی جائیں گی۔