ملتان وزیراعلیٰ پنجاب پرویز الٰہی کے مشیر طارق زمان گجر نے کہا ہے کہ نشتر اسپتال کے دورے کے دوران زبردستی سردخانہ اور چھت کھلوائی تو 200 نعشیں سرد خانے میں تھیں۔
میڈیا کے ساتھ گفتگو میں طارق گجر کا کہنا تھاکہ بدھ کو دن دو بجے نشتر اسپتال کا دورہ کیا ، تو مجھے ایک شخص نے کہا اگر نیک کام کرنا ہے تو سرد خانے چلیں۔ میں نے سرد خانہ کھولنے کا کہا تو نہیں کھول رہے تھے ، جس پر میں نے کہا اگر نہیں کھولا گیا تو ابھی ایف آئی آر کٹواتا ہوں۔
ان کا کہنا تھاکہ سرد خانہ کھلوایا تو وہاں بہت ساری نعشیں تھیں، اندازےکے مطابق 200 سرد خانے میں تھیں، نعشوں پرایک کپڑا تک نہیں تھا۔
انھوں نے کہاکہ اپنی 50 سالہ عمر میں پہلی بار ایسا دیکھا۔
مشیر وزیراعلیٰ کا کہنا تھاکہ اسپتال کی چھت پر نعشوں کو گدھ اور کیڑے کھا رہے تھے جبکہ چھت پر تین تازہ نعشیں اور پرانی 35 تھیں جنہیں گنتی کیا اور ویڈیو بنوائی۔
طارق گجر کا کہنا تھاکہ کچھ نعشیں ایسی لگ رہی تھیں جو دو سال تک پرانی ہوں۔
انہوں نے کہا کہ وی سی سے پوچھا کہ یہ نعشیں یہاں کیوں اس طرح رکھی ہیں؟ وی سی نے جواب دیا کہ یہ میڈیکل کے طلبہ کے تجربات کیلئے رکھی گئی ہیں۔
