سال 2009 ئنا نیام آن بے گواہ ڈاکٹر دین محمد نا مسڑ سمی دین بلوچ وزیر اعظم شہباز شریف نا دا باور تننگ نا بابت ئٹ زیات پر امیت افک کہ اود بے گواہ بندغ آتا معاملہ ءِ بے گواہ کروک آتا مونا ہرفو۔
وزیر اعظم شہباز شریف نا بیان آ تینا خیال ئنا درشانی ءِ کرسہ سمی دین بلوچ پارے کہ دا پوسکنو ہیت ئس افک۔
ڈاکٹر دین محمد ءِ 28 جون 2009 آ ضلع خضدار نا علاقہ اورناچ آن امو وخت بے گواہ کننگا ہرا وخت اود اسہ اسپتال اسیٹی نن ئنا ڈیوٹی آ اسک۔
دہشت گرد آتون و باغی تتون جنگ ئنا پِن آ بلوچستان و مسکوہی فاٹا ٹی چندی سال مست بناء مروکا زور ئٹ بیگواہی نا لڑ تدوکا سال آتیان اسلام آباد، خیبر پختونخواہ و سندھ اتون اوار بلا شاری بنجاہ تیکان تالان مسُنے۔
دا بے گواہ مروک بندغ آتا خاہوت آتا و بندغی حق آتا تنظیم آتا چرجوئی ئٹ مہم آن گڈ مارچ 2011 ٹی زور ئٹ بیگواہی تا زی آ انکوائری کمیشن ہڈ تننگاسس ولے او ہم بیرہ منہ بے گواہ بندغ نا پٹنگ ئٹی سر سہب مس۔
سمی دین بلوچ نا باوہ نا گم و گاری اوفتے چنکی آن محروم کرینے اندا سوب آن اود 14 سال آن بے گواہ بندغ آتیکن توار ہرفسہ بلن مسُنے۔
اونا پاننگ اسک کہ 2008 ئٹی پی پی پی نا حکومت ئٹی بننگ آن گڈ غٹ وزیر اعظم آک بے گواہ بندغ آتا بابت ہیت کرینو، او کُل دا ویل ءِ ایسر کننگ نا ارادہ کرینو ولے اینو اسکان ہچو کاریم ئس متنے۔
اود پاہک کہ 'شہباز شریف نا وڑ عمران خان تون اوار ایلو وزیر اعظم آک ننے یقین تسُنو کہ بلوچ بے گواہ بندغ آتا ویل اوفتا اولی ذمہ واری ءِ ولے دا دعوی تے گواچن مرسہ ہننگ دئسکان باخی ءِ'۔
اونا رد ئٹ سویلین رہشونی بدل مریک ولے اوفتا بیان بازیک اموڑے رہینگرہ، ہرا وخت او حکومت ئٹی مفسہ گڑا دا ویل آ توار ہرفرہ و دادے ایسر کننگ نا وعدہ کیرہ، حکومت ئٹی بننگ آن گڈ اوفک دادے استان دیرہ یا بیرہ بیان بازی کیرہ۔
اود مسلم لیگ (ن) ئنا رہشون مریم نواز نا مثیل ءِ ترسہ پارے کہ مریم نواز تینٹ عمران خان نا حکومت نا وخت آ گواچی مس ہرا وخت اودے و اونا باوہ ءِ جیل ئٹی شاغسہ اوفتے اسٹ ایلو آن جتا کننگا، اندا سوب ءِ کہ اود ننے یقین تس کہ اوفتا حکومت بے گواہ بندغ آتا ویل ءِ ایسر کرو ، داسا اوفتا حکومت ءِ، اوفک بے گواہ بندغ آتے یلہ کرفر۔
