گچک ءَ پاکستانی لشکر لَڈ ءُ بار کرتگیں مردماں پد ءَ لَڈّگ ءُ دگہ جاھاں روگ ءِ بیھار دیگ ءَ اِنت

گچک: پاکستانی لشکر ءَ چہ کوھاں لڈینتگیں مردماں پد ءَ بیھار دیگ ءَ اِنت کہ چہ گچک ءَ بہ لڈ اِت ءُ آدگہ جاھاں برو اِت۔ مئے اھوالکار ءِ رد ءَ اشاں کہ پاکستانی لشکر پہ لَڈ ءُ بار کنگ ءَ بیھار دیگ ءَ اِنت اے مردم کوھی پھوال اَنت کہ پیش ءَ پاکستانی لشکر ءَ پہ زور لڈینتگ ءُ کوچگ ءَ آورتگ اَنت۔ نوں اے مردماں چہ گچک ءَ لڈینگ ءُ دگہ جاھان روگ ءِ بیھار دیگ ءَ اِنت۔ ھندی مردمے ءَ وتی نام پدر نہ کرتگ ءُ گوں ریڈیو زْرمبش ءِ اھوالکار ءَ گوشتگ کہ ما پیش ءَ کوھاں بیتگ ایں مارا پاکستانی لشکر ءَ پہ زور لڈینتگ مئے لکانی کچ ءَ پَس ءُ مال تاوان بیتگ اَنت۔ اے وھد ءَ کہ ما کوچگ ءَ آتکگیں ما اد ءَ بزگریں دھکانکاری کنگ ءَ ایں مئے ڈگارانی کشار تیار اَنت۔ گوستگیں سے روچ بیت کہ مارا پاکستانی لشکر وتی کھن ءِ بنجل ءَ لوٹاھینگ ءُ بیھار دیگ ءَ اِنت کہ چہ گچک ءَ بہ لڈ اِت۔ ھمک روچ لشکر مارا بنجل ءَ لوٹاھینگ ءُ لٹ شاپ کنگ ءَ اِنت۔ مئے بازیں مردمانی پجار کارڈئِے ھم داشتگ اَنت کہ داں ھشت مئی ءَ چہ گچک ءَ در بہ بہ اِت ءُ آدگہ جاھاں برو اِت۔ وتی ڈگار ءُ کشاراں منی نام ءَ بہ کن اِت۔ اگاں کسے ءَ منی پرمان نہ منّ اِت گڑا وتی تاوان ءِ زمہ وار وت اِنت۔ آئی گوشگ اِنت کہ مارا پیش ءَ چہ کوھاں لڈ ءُ بار کنگ ءُ کوچگ ءَ آھگ ءَ لکانی کچ ءَ تاوان بیتگ۔ مئے بازیں پس ءُ مالے رستراں وارتگ ءُ ما وتی بازیں پس ءُ مالے بھا کرتگ۔ آدگہ تاواناں اَبید ما انچو وھد ءَ پہ ڈگارانی کشگ ءَ واری کش اِتگ ءُ مئے کشار تیار اَنت مارا پاکستانی لشکر پہ زور لڈینگ ءَ اِنت۔ ما چہ وتی پت ءُ پیروکی ھنکین ءَ پہ زور لڈینگ ءُ ادا آرگ بیتگ ایں نوں ما پد ءَ پہ زور لڈینگ ءُ دگہ جاھاں دیم دیگ بیگ ءَ ایں۔ پہ گریب ءُ نزوریں مردماں چد ءُ مستریں زوراکی کجام بہ بیت؟ آئی ءَ گوں سرکار ءِ بنجاھی واکدار ءُ مردمی اگبالانی گلاں لوٹ کرتگ ءُ گوشتگ کہ پاکستانی لشکر ءِ زوراکیانی سر ءَ ھیال گور بہ کن اِت ءُ مارا ھک دیگ بہ بیت۔ اگاں شما مئے کمک ءَ نہ کن اِت، اے لشکر ھمک روچ مارا کمشرپ ءُ زوراکی ءِ نشانگ کنگ ءَ اِنت، اگاں شما مئے کمک ءَ نہ کن اِت ما وتی پریات ءَ کئی گور ءَ بہ بر ایں؟