کابل (مانیٹرنگ ڈیسک) افغانستان کے شمالی صوبہ تخارمیں عسکریت پسندوں کے اہم کمانڈر سمیت 8 مشتبہ باغیوں کے مارے جانے کی تصدیق ہوئی ہے۔ افغان انتظامیہ کے چیف ترجمان ذبیح اللہ مجاہد نے ٹوئٹر پر بتایا کہ ہفتے کو جنرل ڈائریکٹوریٹ آف انٹیلی جنس کی خصوصی کارروائی کے دوران تخار کے صوبائی دارالحکومت تلوقان شہر کے ضلع 4 میں اہم کمانڈر یونس ازبکستانی سمیت 8 مشتبہ باغی ہلاک کرکے ان کا ٹھکانہ تباہ کردیا گیا۔ اس دوران صوبائی پولیس کے ترجمان عبدالمبین صافی نے واقعے کی تصدیق کرتے ہوئے بتایا کہ ہفتے کی سہ پہر تلوقان شہر میں کارروائیوں کے دوران مبینہ 8 مسلح مخالفین ہلاک اور 3 زخمی ہوئے۔ تاہم عہدیدار نے یہ نہیں بتایا کہ سیکورٹی اہلکاروں کی ہلاکتیں ہوئی ہیں یا نہیں۔ مقامی افراد کے مطابق کارروائی میں سیکورٹی فورسز کو بھی نقصان اٹھانا پڑا ہے،تاہم حکام نے ابھی تک فورسز کے ممکنہ نقصان بارے کچھ نہیں بتایا ہے
