دشت : مزن بند ءَ لشکر ءِ زوراکی بیستُمی روچ ءَ ھم برجاہ، جنگی بالگرد لشکرکشی ءَ بھر زورگ ءَ اَنت*

کیچ ءِ دمگ دشت ءُ تمپ ءِ میانجی کوہ مزن بند ءَ بیست ءُ پنچ جنوری ءِ شپ ءَ بندات بوتگیں لشکرکشی انگت یکشلا برجاہ اِنت- ھالکارانی رِد ءَ مزن بند کوہ ءِ چاریں نیمگاں لشکر ءَ شیپ ءُ کئورانی دپ بستگ ءُ نشتگ- دشت ءِ نیمگ ءَ گورگی، پنسن کئور، نوکیں راہ، کھیر کئور، جالبار ءُ ھمے وڈ ءَ تمپ ءِ نیمگ ءَ مُزاتی، موس، کلمانی ءُ دگہ جتائیں شیپ ءُ کئورانی دپ ءَ لشکری کارمند نشتگ اَنت- لشکر ءِ زوراکی ءَ مروچی بیست روچ سرجم اِنت اے زوراکی ءَ جھلی لشکر ءِ ھواری ءَ جنگی بالیگ ھم بھر زورگ ءَ اَنت- میانی ءَ سئے روچ ءَ لشکر ءِ بالگرد نَیتکگ اَنت بلے پد ءَ مروچی سئے روچ اِنت کہ لشکر ءِ بالیگ یکّوئی پیداک اَنت- ھندی مردمانی گوشگ اِنت کہ مروچاں شپ ءَ ھم جنگی بالیگ ترّ ءُ گرد کن اَنت سئے شپ اِنت پد ماں پد ءَ جنگی بالیگ پیداک اَنت وھدیکہ جاسوس بالیگ سرجمیں شپ ءَ گشت کن اَنت- گوستگیں دیگر ءَ کاشاپ ءِ نزیک ءَ گورگی سُنٹ ءَ برجاھیں زورگیریں پاکستانی لشکر ءِ چوکی ءِ نیمگ ءَ چہ بے کساس تیرگواری ءُ مارٹرانی توار اِش کنگ بوتگ وھدیکہ اے درگت ءَ گیشیں سرپدی سر نہ بوتگ- مروچی سُھب ءَ یکبرے پد ءَ لشکر ءِ جنگی بالیگ اَتکگ اَنت اے وھد ءَ مزن بند ءِ سر ءَ ترّ ءُ گرد کنگ ءَ اَنت-