*مستونگ: سی ٹی ڈی ءَ نوہ سلاہ بندیں مردم ءِ کُشگ ءِ ٹاہ داتگ*
Oct 23, 2021
مستونگ ءِ کوہ ءَ روشی اسپلنجی سی ٹی ءَ نوہ مردم ءِ کُشگ ءِ ٹاپار جتگ۔
سی ٹی ڈی ءِ جارکش ءَ وتی شنگ کُتگیں درشانے ءَ گْوشتگ کہ لشکر کشی ءِ میان ءَ تیرگْواری ءَ بی ایل اے ءُ بی ایل ایپ ءِ نوہ باسک کُشگ بوتگ۔
جارکش ءَ ٹاپار جتگ کہ چیریں ھالے ءِ دْرچ ءَ سی ٹی ڈی ءَ ناشرکارانی بنجلے ءَ بیڑ بُرتگ تیرگْواری ءِ میان ءَ بی ایل اے ءُ بی ایل ایپ ءَ سیادی داروکیں نوہ مردم کُشگ بوتگ۔ چہ کُشگ بوتگیں مردمانی بنجل ءَ بازیں کچے ءَ سلاہ ءُ تراکناکیں شورہ دزکپتگ۔
سی ٹی ڈی ءِ جارکش ءَ گْوشتگ کہ چہ کُشگ بوتگیں مردماں نوہ سی تیری، بیست کلو تراکناکیں شورہ، پرائما کارڈ، ڈیٹونیٹر ءُ آر پی جی راکٹ گوں دو گولا ءَ دزکپتگ۔ اے مردمانی ارزی سی ٹی ڈی گس ءَ نبشتہ کنگ ءُ گیش پٹ ءُ پول کنگ بوگ ءَ اِنت۔
یات بہ بہ اِت کہ ایشی ءَ پیش ھم سی ٹی ڈی ءَ کلپیں میڑ ءِ نام ءَ بیگواھیں بلوچ نشانگ کُتگ اَنت۔ اے مردمانی درگت ءَ انگت راستی دیم ءَ نَیتکگ بلے گمان کنگ بوگ ءِ اِنت کہ اے بری ھم سی ٹی ڈی ءَ کلپیں میڑ ءِ نام ءَ بیگواھیں مردم نشانگ کُتگ اَنت۔