*کیچ: مزن بند ءَ پاکستانی لشکر ءِ زوراکی برجاہ، ٹوھیں کاروانے گوں ھر ءُ پرپٹاں کوہ ءَ شتگ
*
*بلوچستان ٹوڈے بلوچی*
Oct 19, 2021
کیچ ءِ دمگ دشت ءُ تمپ ءِ میانجی ءِ کوہ مزن بند ءَ لشکر ءِ زوراکی برجاہ اِنت-
ھالکارانی رِد ءَ مروچی سُھب ءَ تمپ ءِ دمگ کلاھو ءَ چہ پاکستانی لشکر ءِ کاروانے جالبار ءِ راہ ءَ دیم پہ مزن بند ءَ شُتگ-
کاروان ءَ ٹرک ءُ دگہ کسانیں گاڈیاں ھوار پرپٹ ءُ مزنیں کچّے ءَ ھر گون بوتگ ءُ لشکری ٹرک ءَ تمبو ءُ دگہ مڈی مان بوتگ چریشی ءَ چہ گمان کنگ بیت کہ پاکستانی لشکر مزنیں کچّے ءَ زوراکی کنگ ءَ دلمانگ اِنت وھدیکہ تمپ دازن ءِ نیمگ ءَ مُزاتیگ کور ءَ لشکر ءَ نوکیں چوکی یے جوڈ کتگ ءُ نشتگ-
دومی نیمگ ءَ پاکستانی لشکر ءَ جالبار ءِ کِشک ھرچ وڈیں رؤگ ءُ آیگ ءِ واستا بند کتگ، دمگی مردمانی گوشگ اِنت کہ پاکستانی لشکر ءَ ماھے ءَ پیش جار جتگ کہ اے راہ بند اِنت کس ءَ رؤگ ءُ آیگ ءِ موکل نیست وھدیکہ دو روچ ءَ پیش جالبار ءِ دوئیں نیمگاں کِشک ءِ سر ءَ پاکستانی لشکر ءَ گار جتگ ءُ راہ مدامی ءِ واستا بند کتگ-